Zaburi 126 - Bibiliya Yera

¹ Indirimbo y'Amazamuka. Ubwo Uwiteka yagaruraga abajyanywe ho iminyago b'i Siyoni, Twari tumeze nk'abarota.

² Icyo gihe akanwa kacu kari kuzuye ibitwenge, N'indimi zacu zari zuzuye indirimbo. Icyo gihe bavugiraga mu mahanga bati “Uwiteka yabakoreye ibikomeye.”

³ Uwiteka yadukoreye ibikomeye, Natwe turishimye.

⁴ Uwiteka, abajyanywe ho iminyago utugarure, Tumere nk'imigezi y'i Negebu.

⁵ Ababiba barira, Bazasarura bishima.

⁶ Nubwo umuntu agenda arira asohoye imbuto, Azagaruka yishima azanye imiba ye.