Zaburi 124 - Bibiliya Yera

¹ Indirimbo ya Dawidi y'Amazamuka. Iyaba Uwiteka atari we wari uri mu ruhande rwacu, Abe ari ko Abisirayeli bavuga none.

² Iyaba Uwiteka atari we wari uri mu ruhande rwacu, Ubwo abantu baduhagurukiraga,

³ Baba baratumize bunguri tukiri bazima, Ubwo umujinya wabo wacanwaga kuri twe.

⁴ Amazi aba yaraturengeye rwose, Isūri iba yaratembye ku bugingo bwacu,

⁵ Amazi yihindurije aba yaratembye ku bugingo bwacu.

⁶ Uwiteka ahimbazwe, Utadutanze kuba nk'umuhīgo w'amenyo yabo.

⁷ Ubugingo bwacu bukize nk'uko inyoni iva mu kigoyi cy'abagoyi, Ikigoyi kiracitse, natwe tuvamo turakira.

⁸ Gutabarwa kwacu kubonerwa mu izina ry'Uwiteka, Waremye ijuru n'isi.