Zaburi 119 - Bibiliya Yera

ALEFU

¹ Hahirwa abagenda batunganye, Bakagendera mu mategeko y'Uwiteka.

² Hahirwa abitondera ibyo yahamije, Bakamushakisha umutima wose.

³ Ni koko nta cy'ubugoryi bakora, Bagendera mu nzira ze.

⁴ Wategekeye amategeko wigishije, Kugira ngo bayitondere n'umwete.

⁵ Icyampa inzira zanjye zigakomerera, Kwitondera amategeko wandikishije.

⁶ Ubwo nzita ku byo wategetse byose, Ni bwo ntazakorwa n'isoni.

⁷ Nzagushimisha umutima utunganye, Nimara kwiga amateka yawe yo gukiranuka.

⁸ Nzajya nitondera amategeko wandikishije, Ntundeke rwose.

BETI

⁹ Umusore azeza inzira ye ate? Azayejesha kuyitondera nk'uko ijambo ryawe ritegeka.

¹⁰ Nagushakishije umutima wose, Ntukunde ko nyoba ngo ndeke ibyo wategetse.

¹¹ Nabikiye ijambo ryawe mu mutima wanjye, Kugira ngo ntagucumuraho.

¹² Uwiteka, uri uwo guhimbazwa, Ujye unyigisha amategeko wandikishije.

¹³ Iminwa yanjye yatekerereje abantu, Amateka y'akanwa kawe yose.

¹⁴ Njya nishimira inzira y'ibyo wahamije, Ngo nyihwanye n'ubutunzi bwose.

¹⁵ Nzibwira amategeko wigishije, Kandi nzita ku nzira zawe.

¹⁶ Nzishimira amategeko wandikishije, Sinzibagirwa ijambo ryawe.

GIMELU

¹⁷ Ugirire neza umugaragu wawe, Kugira ngo mbeho nitondere ijambo ryawe.

¹⁸ Hwejesha amaso yanjye, Kugira ngo ndebe ibitangaza byo mu mategeko yawe.

¹⁹ Ndi umusuhuke mu isi, Ntumpishe ibyo wategetse.

²⁰ Umutima wanjye ushenguwe no kwifuza, Ujya wifuza amateka yawe ibihe byose.

²¹ Uhana abībone ari bo bivume, Byiyobagiza ibyo wategetse.

²² Unkureho umugayo n'igisuzuguriro, Kuko njya nitondera ibyo wahamije.

²³ N'abakomeye bicaraga bamvuga nabi, Ariko umugaragu wawe nkibwira amategeko wandikishije.

²⁴ Kandi nishimira ibyo wahamije, Ni byo bingīra inama.

DALETI

²⁵ Umutima wanjye womatanye n'umukungugu, Unzure nk'uko ijambo ryawe ryasezeranije.

²⁶ Nagutekerereje inzira zanjye uransubiza, Ujye unyigisha amategeko wandikishije.

²⁷ Umenyeshe inzira y'amategeko wigishije, Kugira ngo nibwire imirimo itangaza wakoze.

²⁸ Umutima wanjye urijijwe n'agahinda, Nkomeza nk'uko ijambo ryawe ryasezeranije.

²⁹ Unkureho inzira y'ibinyoma, Umpere amategeko yawe ubuntu.

³⁰ Nahisemo inzira y'umurava, Nashyize amateka yawe imbere yanjye.

³¹ Nomatanye n'ibyo wahamije, Uwiteka, ntunkoze isoni.

³² Nzagenda niruka mu nzira y'ibyo wategetse, Ubwo uzagūra umutima wanjye.

HE

³³ Uwiteka, ujye unyigisha inzira y'amategeko wandikishije: Kugira ngo nyitondere kugeza ku mperuka.

³⁴ Umpe ubwenge, kugira ngo nitondere amategeko yawe; Nyitondereshe umutima wose.

³⁵ Uncishe mu nzira y'ibyo wategetse, Kuko ari byo nishimira.

³⁶ Uhindurire umutima wanjye ku byo wahamije, Ariko si ku ndamu mbi.

³⁷ Ukebukishe amaso yanjye ye kureba ibitagira umumaro, Unzurire mu nzira zawe.

³⁸ Ukomereze umugaragu wawe ijambo ryawe, Ryasezeranijwe abakubaha.

³⁹ Unkureho umugayo ntinya, Kuko amateka yawe ari meza.

⁴⁰ Dore njya nifuza amategeko wigishije, Unzure ku bwo gukiranuka kwawe.

VAWU

⁴¹ Uwiteka, imbabazi zawe zingereho, Ni zo gakiza kawe nk'uko ijambo ryawe ryasezeranije.

⁴² Ni ho nzabona icyo mbwira untutse, Kuko niringira ijambo ryawe.

⁴³ Kandi ntukure rwose ijambo ry'ukuri mu kanwa kanjye, Kuko njya niringira kubona amateka yawe.

⁴⁴ Ni ho nzajya nitondera amategeko yawe, Ubudasiba iteka ryose.

⁴⁵ Kandi nzagendana umudendezo, Kuko njya ndondora amategeko wigishije.

⁴⁶ Nzavugira imbere y'abami ibyo wahamije, Ne gukorwa n'isoni.

⁴⁷ Kandi nzishimira ibyo wategetse, Ndabikunda.

⁴⁸ Kandi nzamanikira amaboko ibyo wategetse, ndabikunda, Kandi nzibwira amategeko wandikishije.

ZAYINI

⁴⁹ Wibuke ijambo wasezeranije umugaragu wawe, Kuko wanyiringije.

⁵⁰ Iki ni cyo kimara umubabaro mu makuba yanjye no mu byago byanjye, Ni uko ijambo ryawe ryanzuye.

⁵¹ Abibone bajya bankoba cyane, Ariko sinteshuke ngo mve mu mategeko yawe.

⁵² Uwiteka, njya nibuka amateka yawe ya kera, Nkīmara umubabaro.

⁵³ Uburakari bwotsa buramfashe, Ntewe n'abanyabyaha bareka amategeko yawe.

⁵⁴ Amategeko wandikishije abereye indirimbo zanjye, Mu nzu y'ubusuhuke bwanjye.

⁵⁵ Uwiteka, njya nibuka izina ryawe nijoro, Nkitondera amategeko yawe.

⁵⁶ Iki ni cyo nahawe: Ni ukwitondera amategeko wigishije.

HETI

⁵⁷ Uwiteka ni we mugabane wanjye, Navuze yuko nzitondera amagambo yawe.

⁵⁸ Njya ngushakisha umutima wose kundebana urukundo, Umbabarire, nk'uko ijambo ryawe ryasezeranije.

⁵⁹ Njya ntekereza inzira zanjye, Ngahindurira ibirenge byanjye ku byo wahamije.

⁶⁰ Ngatebuka sintinde, Kwitondera ibyo wategetse.

⁶¹ Ikigoyi cy'abanyabyaha kirambohaboshye, Ariko sinibagirwa amategeko yawe.

⁶² Mu gicuku nzakanguka ngushimire, Amateka yawe yo gukiranuka.

⁶³ Mbana n'abakubaha bose, N'abitondera amategeko wigishije.

⁶⁴ Uwiteka, isi yuzuye imbabazi zawe, Ujye unyigisha amategeko wandikishije.

TETI

⁶⁵ Uwiteka, wagiriye neza umugaragu wawe, Nk'uko ijambo ryawe ryasezeranije.

⁶⁶ Ujye unyigisha guhitamo neza no kumenya ubwenge, Kuko nizera amategeko yawe.

⁶⁷ Ntarababazwa narayobaga, Ariko none nitondera ijambo ryawe.

⁶⁸ Uri mwiza kandi ugira neza, Ujye unyigisha amategeko wandikishije.

⁶⁹ Abibone bajya bandemera ibinyoma, Ariko jyeweho nzitonderesha amategeko yawe umutima wanjye wose.

⁷⁰ Imitima yabo ihonjotse nk'ibinure, Ariko jyeweho nishimira amategeko yawe.

⁷¹ Kubabazwa kwangiriye umumaro, Kugira ngo nige amategeko wandikishije.

⁷² Amategeko yo mu kanwa kawe ni ay'igiciro kuri jye, Kiruta icy'ibice ibihumbi by'ifeza n'izahabu.

YODI

⁷³ Intoki zawe ni zo zandemye, ni zo zambumbye, Umpe ubwenge kugira ngo nige ibyo wategetse.

⁷⁴ Abakūbaha bazandeba bishime, Kuko niringira ijambo ryawe.

⁷⁵ Uwiteka, nzi yuko amateka yawe ari ayo gukiranuka, Kandi yuko umurava ari wo waguteye kuncisha bugufi.

⁷⁶ Ndakwinginze, imbabazi zawe zimare umubabaro, Nk'uko ijambo ryawe riri wasezeranije umugaragu wawe.

⁷⁷ Ibambe ryawe ringereho kugira ngo mbeho, Kuko amategeko yawe ari yo munezero wanjye.

⁷⁸ Abībone bakorwe n'isoni, Kuko bandenganishije ibinyoma, Ariko jyeweho nzajya nibwira amategeko yawe.

⁷⁹ Abakūbaha bampindukirire, Kugira ngo bamenye ibyo wahamije.

⁸⁰ Umutima wanjye utungane mu mategeko wandikishije, Kugira ngo ne gukorwa n'isoni.

KAFU

⁸¹ Umutima wanjye ugushwa isari no kwifuza agakiza kawe, Ariko niringira ijambo ryawe.

⁸² Amaso yanjye amarwa no kwifuza ijambo ryawe, Nkivuga nti “Uzamara umubabaro ryari?”

⁸³ Kuko mpindutse nk'imvumba y'uruhu iba ku mwotsi, Ariko sinibagirwe amategeko wandikishije.

⁸⁴ Iminsi y'ubugingo bw'umugaragu wawe ni ingahe? Uzasohoza ryari iteka ku bangenza?

⁸⁵ Abibone badakurikiza amategeko yawe, Bandimiye amashya.

⁸⁶ Ibyo wategetse byose ni umurava, Bangenjesha ibinyoma, ntabara.

⁸⁷ Bashigaje hato bakandimbura mu isi, Ariko sinareka amategeko wigishije.

⁸⁸ Unzure nk'uko imbabazi zawe ziri, Kugira ngo nitondere ibyo akanwa kawe kahamije.

LAMEDI

⁸⁹ Uwiteka, iteka ryose, Ijambo ryawe rihora mu ijuru rihamye.

⁹⁰ Umurava wawe uhoraho ibihe byose, Wakomeje isi igumaho.

⁹¹ Amategeko yawe ni yo atuma byose bibaho uyu munsi, Kuko byose bigukorera.

⁹² Iyaba amategeko yawe atari yo munezero wanjye, Cya gihe mba nararimbuwe n'umubabaro wanjye.

⁹³ Ntabwo nzibagirwa amategeko wigishije, Kuko ari yo wanzurishije.

⁹⁴ Ndi uwawe nkiza, Kuko ndondora amategeko wigishije.

⁹⁵ Abanyabyaha bajya bantegerereza kundimbura, Ariko nzita ku byo wahamije.

⁹⁶ Narebye yuko ibitunganye rwose byose bifite aho bigarukira, Ariko amategeko yawe ni magari cyane.

MEMU

⁹⁷ Amategeko yawe nyakunda ubu bugeni, Ni yo nibwira umunsi ukīra.

⁹⁸ Ibyo wategetse bituma ndusha abanzi banjye ubwenge, Kuko bihorana nanjye iteka.

⁹⁹ Mfite ubwenge buruta ubw'abigisha banjye bose, Kuko ibyo wahamije ari ibyo nibwira.

¹⁰⁰ Ndajijuka nkarusha abasaza, Kuko njya nitondera amategeko wigishije.

¹⁰¹ Njya ndinda ibirenge byanjye inzira mbi zose, Kugira ngo nitondere ijambo ryawe.

¹⁰² Simva mu mateka yawe, Kuko ari wowe wanyigishije.

¹⁰³ Amagambo yawe aryohereye ubu bugeni mu nkanka zanjye, Arusha ubuki kuryohera mu kanwa kanjye.

¹⁰⁴ Amategeko wigishije ampesha guhitamo, Ni cyo gituma nanga inzira z'ibinyoma zose.

NUNI

¹⁰⁵ Ijambo ryawe ni itabaza ry'ibirenge byanjye, Ni umucyo umurikira inzira yanjye.

¹⁰⁶ Nararahiye ndabikomeza, Yuko nzitondera amateka yawe yo gukiranuka.

¹⁰⁷ Ndababazwa cyane, Uwiteka, unzure nk'uko ijambo ryawe ryasezeranije.

¹⁰⁸ Uwiteka ndakwinginze, Wemere amaturo y'akanwa kanjye ava mu rukundo, Kandi ujye unyigisha amateka yawe.

¹⁰⁹ Ubugingo bwanjye buri mu kaga iteka, Ariko sinibagirwa amategeko yawe.

¹¹⁰ Abanyabyaha bajya bantega ikigoyi, Ariko sinyobe amategeko wigishije.

¹¹¹ Ibyo wahamije nabyendeye kuba umwandu wanjye iteka, Kuko ari byo byishimo by'umutima wanjye.

¹¹² Nshyize umutima wanjye ku gusohoza amategeko yawe, Iteka ryose kugeza ku mperuka.

SAMEKI

¹¹³ Nanga ab'imitima ibiri, Ariko amategeko yawe ndayakunda.

¹¹⁴ Ni wowe bwihisho bwanjye n'ingabo inkingira, Niringira ijambo ryawe.

¹¹⁵ Mwa nkozi z'ibibi mwe, nimuve aho ndi, Kugira ngo nitondere ibyo Imana yanjye yategetse.

¹¹⁶ Umbere ubwishingikirizo nk'uko ijambo ryawe ryasezeranije, Kugira ngo mbeho ne kuzakozwa isoni n'ibyiringiro byanjye.

¹¹⁷ Undamire nzaba mu mahoro, Njye nitondera amategeko wandikishije.

¹¹⁸ Wasuzuguye abiyobagiza bose amategeko wandikishije, Kuko uburiganya bwabo ari ibinyoma.

¹¹⁹ Ukuraho abanyabyaha bo mu isi bose nk'inkamba, Ni cyo gituma nkunda ibyo wahamije.

¹²⁰ Umubiri wanjye uhindishwa umushyitsi no kugutinya, Kandi ntinya amateka yawe.

AYINI

¹²¹ Njya nkora ibihūra n'amateka n'ibyo gukiranuka, Ntundekere abampata.

¹²² Wigwatirize yuko uzagirira neza umugaragu wawe, Abībone be kumpata.

¹²³ Amaso yanjye amarwa no kwifuza agakiza kawe, N'ijambo ryawe ryo gukiranuka.

¹²⁴ Ujye ugirira umugaragu wawe ibihwanye n'imbabazi zawe, Kandi unyigishe amategeko wandikishije.

¹²⁵ Ndi umugaragu wawe umpe ubwenge, Kugira ngo menye ibyo wahamije.

¹²⁶ Igihe gikwiriye cyo gukora k'Uwiteka kirasohoye, Kuko bahinduye ubusa amategeko yawe.

¹²⁷ Ni cyo gituma nkunda ibyo wategetse, Nkabirutisha izahabu naho yaba izahabu nziza.

¹²⁸ Ni cyo gituma nibwira yuko amategeko wigishije yose atunganye, Kandi nanga inzira z'ibinyoma zose.

PE

¹²⁹ Ibyo wahamije ni ibitangaza, Ni cyo gituma umutima wanjye ubyitondera.

¹³⁰ Guhishurirwa amagambo yawe kuzana umucyo, Guha abaswa ubwenge.

¹³¹ Nasama akanwa nkahagira, Kuko nifuza amategeko yawe.

¹³² Unkebuke umbabarire, Nk'uko umenyereye kubabarira abakunda izina ryawe.

¹³³ Ujye utunganya intambwe zanjye mu ijambo ryawe, Gukiranirwa kose kwe kuntegeka.

¹³⁴ Uncungure ne guhatwa n'abantu, Kugira ngo nitondere amategeko wigishije.

¹³⁵ Umurikishirize umugaragu wawe mu maso hawe, Unyigishe amategeko wandikishije.

¹³⁶ Amaso yanjye atembyemo imigezi y'amazi, Kuko batitondera amategeko yawe.

TSADE

¹³⁷ Uwiteka, uri umukiranutsi, Amateka yawe aratunganye.

¹³⁸ Ibyo wahamije wabitegekesheje gukiranuka, N'umurava nyakuri.

¹³⁹ Ishyaka ryanjye rirandimbuye, Kuko abanzi banjye bibagiwe amagambo yawe.

¹⁴⁰ Ijambo ryawe ryaravugutiwe cyane, Ni cyo gituma umugaragu wawe ndikunda.

¹⁴¹ Ndoroheje baransuzugura, Ariko sinibagirwa amategeko wigishije.

¹⁴² Gukiranuka kwawe ni ugukiranuka kw'iteka ryose, Amategeko yawe ni ukuri.

¹⁴³ Agahinda n'umubabaro biranteye, Ariko, ibyo wategetse ni byo munezero wanjye.

¹⁴⁴ Ibyo wahamije ni ibyo gukiranuka iteka ryose, Umpe ubwenge kugira ngo mbeho.

KOFU

¹⁴⁵ Ntakishije umutima wose, Uwiteka nsubiza, Nzitondera amategeko wandikishije.

¹⁴⁶ Ndagutakiye nkiza, Kugira ngo nitondere ibyo wahamije.

¹⁴⁷ Njya nzinduka umuseke utaratambika ngataka, Amagambo yawe ni yo niringira.

¹⁴⁸ Amaso yanjye abanziriza ibicuku, Kugira ngo nibwire ijambo ryawe.

¹⁴⁹ Umva ijwi ryanjye nk'uko imbabazi zawe ziri, Uwiteka, unzure nk'uko iteka ryawe riri.

¹⁵⁰ Abangenjesha igomwa baregereye, Bishyize kure y'amategeko yawe.

¹⁵¹ Uwiteka, uri bugufi, Ibyo wategetse byose ni ukuri.

¹⁵² Uhereye kera namenyeshejwe n'ibyo wahamije, Yuko wabikomeje iteka ryose.

RESHI

¹⁵³ Ita ku mubabaro wanjye unkize, Kuko ntibagirwa amategeko yawe.

¹⁵⁴ Umburanire uncungure, Unzure nk'uko ijambo ryawe ryasezeranije.

¹⁵⁵ Agakiza kari kure y'abanyabyaha, Kuko batarondora amategeko wandikishije.

¹⁵⁶ Uwiteka, imbabazi zawe zirakomeye, Unzure nk'uko amateka yawe ari.

¹⁵⁷ Abangenza n'abanzi banjye ni benshi, Ariko sinteshuka ngo mve mu byo wahamije.

¹⁵⁸ Nabonye abava mu isezerano ndabīnuba, Kuko batitondera ijambo ryawe.

¹⁵⁹ Ita ku rukundo nkunda amategeko wigishije, Uwiteka, unzure nk'uko imbabazi zawe ziri.

¹⁶⁰ Indunduro y'ijambo ryawe ryose ni ukuri, Amateka yawe yo gukiranuka ahoraho iteka ryose hadasigaye na rimwe.

SHINI

¹⁶¹ Abakomeye bajya bangenzereza ubusa, Ariko amagambo yawe ni yo ahindisha umushyitsi umutima wanjye.

¹⁶² Nishimira ijambo ryawe, Nk'ubonye iminyago myinshi.

¹⁶³ Nanga ibinyoma, mbyanga urunuka, Ariko amategeko yawe ndayakunda.

¹⁶⁴ Uko bukeye ngushimira karindwi, Amateka yawe yo gukiranuka.

¹⁶⁵ Abakunda amategeko yawe bagira amahoro menshi, Nta kigusha bafite.

¹⁶⁶ Uwiteka, njya niringira agakiza kawe, Kandi ngakora ibyo wategetse.

¹⁶⁷ Umutima wanjye ujya witondera ibyo wahamije, Kandi mbikunda rwose.

¹⁶⁸ Njya nitondera amategeko wigishije n'ibyo wahamije, Kuko inzira zawe zose ziri imbere yawe.

TAWU

¹⁶⁹ Uwiteka, gutaka kwanjye kukwegere, Umpe ubwenge nk'uko ijambo ryawe ryasezeranije.

¹⁷⁰ Kwinginga kwanjye kujye imbere yawe, Unkize nk'uko ijambo ryawe ryasezeranije.

¹⁷¹ Iminwa yanjye ivuge ishimwe, Kuko unyigisha amategeko wandikishije.

¹⁷² Ururimi rwanjye ruririmbe ijambo ryawe, Kuko ibyo wategetse byose ari ibyo gukiranuka.

¹⁷³ Ukuboko kwawe kube kwiteguye kuntabara, Kuko nahisemo amategeko wigishije.

¹⁷⁴ Uwiteka, njya nifuza agakiza kawe, Kandi amategeko yawe ni yo munezero wanjye.

¹⁷⁵ Umutima wanjye ubeho kugira ngo ugushime, Amateka yawe antabare.

¹⁷⁶ Nayobye nk'intama izimiye, Shaka umugaragu wawe, Kuko ntibagirwa amategeko yawe.