Zaburi 118 - Bibiliya Yera

¹ Nimushimire Uwiteka yuko ari mwiza, Kuko imbabazi ze zihoraho iteka ryose.

² Abisirayeli bavuge bati “Imbabazi ze zihoraho iteka ryose.”

³ Inzu y'aba Aroni ivuge iti “Imbabazi ze zihoraho iteka ryose.”

⁴ Abubaha Uwiteka bavuge bati “Imbabazi ze zihoraho iteka ryose.”

⁵ Ubwo nari mu mubabaro nambaje Uwiteka, Uwiteka aranyitaba anshyira ahantu hagari.

⁶ Uwiteka ari mu ruhande rwanjye sinzatinya, Umuntu yabasha kuntwara iki?

⁷ Uwiteka ari mu ruhande rwanjye arantabara, Ni cyo gituma nzabona icyo nshakira abanzi banjye.

⁸ Guhungira ku Uwiteka kugira umumaro, Kuruta kwiringira abantu.

⁹ Guhungira ku Uwiteka kugira umumaro, Kuruta kwiringira abakomeye.

¹⁰ Amahanga yose yarangose, Mu izina ry'Uwiteka ndayarimbura.

¹¹ Yarangose ni koko yarangose, Mu izina ry'Uwiteka ndayarimbura.

¹² Bangose nk'inzuki, Bazima nk'umuriro w'amahwa, Mu izina ry'Uwiteka ndayarimbuye.

¹³ Wansunikiye cyane kungusha, Maze Uwiteka arantabara.

¹⁴ Uwiteka ni we mbaraga zanjye n'indirimbo yanjye, Kandi yahindutse agakiza kanjye.

¹⁵ Ijwi ry'impundu bavugiriza agakiza riri mu mahema y'abakiranutsi, Ukuboko kw'iburyo k'Uwiteka gukora iby'ubutwari.

¹⁶ Ukuboko kw'iburyo k'Uwiteka gushyizwe hejuru, Ukuboko kw'iburyo k'Uwiteka gukora iby'ubutwari.

¹⁷ Sinzapfa ahubwo nzarama, Ntekerereze abantu imirimo Uwiteka yakoze.

¹⁸ Uwiteka yampannye igihano cyane, Ariko ntiyampaye urupfu.

¹⁹ Munyuguririre amarembo yo gukiranuka, Ndinjiramo nshima Uwiteka.

²⁰ Iryo ni ryo rembo ry'Uwiteka, Abakiranutsi ni bo bazaricamo.

²¹ Ndagushimira kuko wanshubije, Ukampindukira agakiza.

²² Ibuye abubatsi banze, Ni ryo ryahindutse irikomeza impfuruka.

²³ Ibyo byavuye ku Uwiteka, Kandi ni ibitangaza mu maso yacu.

²⁴ Uyu ni wo munsi Uwiteka yaremye, Turawishimiramo turawunezererwamo.

²⁵ Uwiteka, turakwinginze udukize, Uwiteka, turakwinginze uduhe kugubwa neza.

²⁶ Hahirwa uje mu izina ry'Uwiteka, Tubasabiriye umugisha mu nzu y'Uwiteka.

²⁷ Uwiteka ni Imana y'imbaraga ituvushirije umucyo, Muboheshe igitambo imigozi, Mukijyane ku mahembe y'igicaniro.

²⁸ Ni wowe Mana yanjye y'imbaraga nzagushima, Ni wowe Mana yanjye nzagusingiza.

²⁹ Nimushimire Uwiteka yuko ari mwiza, Kuko imbabazi ze zihoraho iteka ryose.