Zaburi 115 - Bibiliya Yera

¹ Ntabe ari twe Uwiteka, ntabe ari twe, Ahubwo izina ryawe abe ari ryo uha icyubahiro, Ku bw'imbabazi zawe n'umurava wawe.

² Kuki abanyamahanga babaza bati “Imana yabo iri he?”

³ Ariko Imana yacu iri mu ijuru, Yakoze ibyo yashatse byose.

⁴ Ibishushanyo ba bandi basenga ni ifeza n'izahabu, Umurimo w'intoki z'abantu.

⁵ Bifite akanwa ntibivuga, Bifite amaso ntibirora,

⁶ Bifite amatwi ntibyumva, Bifite amazuru ntibinukirwa,

⁷ Bifite intoki ntibikorakora, Bifite ibirenge ntibigenda, Kandi ntibivugisha imihogo yabyo.

⁸ Ababirema bazahwana na byo, N'ubyiringira wese.

⁹ Wa bwoko bw'Abisirayeli we, wiringire Uwiteka, Ni we mutabazi wabo n'ingabo ibakingira.

¹⁰ Wa nzu y'aba Aroni we, mwiringire Uwiteka, Ni we mutabazi wabo n'ingabo ibakingira.

¹¹ Mwa bubaha Uwiteka mwe, mwiringire Uwiteka, Ni we mutabazi wabo n'ingabo ibakingira.

¹² Uwiteka aratwibutse azaduha umugisha, Azaha umugisha inzu y'Abisirayeli, Azaha umugisha inzu y'aba Aroni.

¹³ Azaha umugisha abubaha Uwiteka, Aboroheje n'abakomeye.

¹⁴ Uwiteka abagwize, Abagwizanye n'abana banyu.

¹⁵ Muhawe umugisha n'Uwiteka, Waremye ijuru n'isi.

¹⁶ Ijuru ni iry'Uwiteka, Ariko isi yayihaye abantu.

¹⁷ Abapfuye ntibashima Uwiteka, Cyangwa abamanuka bajya ahacecekerwa.

¹⁸ Ariko twebweho tuzajya duhimbaza Uwiteka. Uhereye none ukageza iteka ryose. Haleluya.