Zaburi 113 - Bibiliya Yera

¹ Haleluya. Mwa bagaragu b'Uwiteka mwe, nimushime, Nimushime izina ry'Uwiteka.

² Izina ry'Uwiteka rihimbazwe, Uhereye none ukageza iteka ryose.

³ Uhereye aho izuba rirasira ukageza aho rirengera, Izina ry'Uwiteka rikwiriye gushimwa.

⁴ Uwiteka ari hejuru y'amahanga yose, Icyubahiro cye gisumba ijuru.

⁵ Ni nde uhwanye n'Uwiteka Imana yacu, Ufite intebe ye hejuru cyane,

⁶ Akicishiriza bugufi kureba, Ibyo mu ijuru n'ibyo mu isi?

⁷ Akura uworoheje mu mukungugu, Ashyira hejuru umukene amukuye mu icukiro,

⁸ Kugira ngo amwicaranye n'abakomeye, Abakomeye bo mu bwoko bwe.

⁹ Uwari ingumba mu nzu ye, Amuha kuyibamo yishimye, Ari nyina w'abahungu. Haleluya.