Zaburi 111 - Bibiliya Yera

¹ Haleluya. Nzashimisha Uwiteka umutima wanjye wose, Mu rukiko rw'abatunganye no mu iteraniro ryabo.

² Imirimo Uwiteka yakoze irakomeye, Irondorwa n'abayishimira bose.

³ Umurimo akora ni icyubahiro n'ubwiza, Gukiranuka kwe guhoraho iteka ryose.

⁴ Yahaye imirimo ye itangaza urwibutso, Uwiteka ni umunyambabazi n'umunyebambe.

⁵ Yagaburiye abamwubaha, Azajya yibuka isezerano rye.

⁶ Yeretse ubwoko bwe imirimo ye uburyo ikomeye, Ubwo yabahaga umwandu w'abanyamahanga.

⁷ Imirimo y'intoki ze ni umurava no kutabera, Amategeko ye yose arahamye.

⁸ Yakomerejwe guhama iteka ryose, Yategekeshejwe umurava no gutunganya.

⁹ Yoherereje ubwoko bwe gucungurwa, Yategetse isezerano rye kuba iry'iteka, Izina rye ni iryera n'iryo kubahwa.

¹⁰ Kubaha Uwiteka ni ishingiro ry'ubwenge, Abakora ibyo bafite ubwenge nyakuri, Ishimwe rye rihoraho iteka ryose.