Zaburi 107 - Bibiliya Yera

IGICE CYA GATANU

¹ Nimushimire Uwiteka yuko ari mwiza, Kuko imbabazi ze zihoraho iteka ryose.

² Abacunguwe n'Uwiteka bavuge batyo, Abo yacunguye akabakura mu kuboko k'umwanzi,

³ Akabatarurukanya abakura mu bihugu, Aho izuba rirasira n'aho rirengera, Ikasikazi no ku nyanja.

⁴ Bazerereye mu butayu mu nzira itagira abantu, Ntibabona umudugudu wo kubamo.

⁵ Bicwa n'inzara n'inyota, Imitima yabo igwa isari.

⁶ Maze batakira Uwiteka bari mu byago, Abakiza imibabaro yabo.

⁷ Abashorerera mu nzira igororotse, Kugira ngo bagere mu mudugudu wo kubamo.

⁸ Abo bashimire Uwiteka kugira neza kwe, N'imirimo itangaza yakoreye abantu.

⁹ Kuko yahagije umutima wifuza, N'umutima ushonje yawujuje ibyiza.

¹⁰ Abandi bicaraga mu mwijima no mu gicucu cy'urupfu, Baboheshejwe umubabaro n'ibyuma,

¹¹ Kuko bagomeye amagambo y'Imana, Bagasuzugura imigambi y'Isumbabyose.

¹² Ni cyo cyatumye icishisha bugufi imitima yabo umuruho, Bakagwa ntibagire ubatabara.

¹³ Maze batakira Uwiteka bari mu makuba, Abakiza imibabaro yabo.

¹⁴ Abakura mu mwijima no mu gicucu cy'urupfu, Aca iminyururu yabo.

¹⁵ Abo bashimire Uwiteka kugira neza kwe, N'imirimo itangaza yakoreye abantu.

¹⁶ Kuko yamennye inzugi z'imiringa, Akavuna ibihindizo by'ibyuma.

¹⁷ Ibirimarima bibabarizwa ibicumuro byabyo, No gukiranirwa kwabyo.

¹⁸ Imitima yabo ihurwa ibyokurya iyo biva bikajya, Bakegera amarembo y'urupfu.

¹⁹ Maze bagatakira Uwiteka bari mu byago, Akabakiza imibabaro yabo.

²⁰ Akohereza ijambo rye akabakiza indwara, Akabakiza kwinjira mu mva zabo.

²¹ Abo bashimire Uwiteka kugira neza kwe, N'imirimo itangaza yakoreye abantu.

²² Batamba ibitambo by'ishimwe, Bogeresha imirimo ye indirimbo z'ibyishimo.

²³ Abamanuka bajya mu nyanja bakagenda mu nkuge, Bagatundira mu mazi y'isanzure,

²⁴ Barebeye imirimo y'Uwiteka n'ibitangaza bye imuhengeri.

²⁵ Kuko yategetse agahuhisha umuyaga w'ishuheri, Ushyira hejuru umuraba waho.

²⁶ Barazamukaga bakajya mu ijuru, Bagasubira bakamanuka bakajya ikuzimu, Imitima yabo ikayagishwa n'umubabaro.

²⁷ Bakazunga muzunga, Bakadandabirana nk'umusinzi, Ubwenge bwabo bwose bukazinduka.

²⁸ Maze batakira Uwiteka bari mu byago, Abakiza imibabaro yabo.

²⁹ Aturisha uwo muyaga w'ishuheri, Umuraba uratuza.

³⁰ Maze bīshimishwa n'uko utuje, Kandi abajyana mu mwaro bashakaga.

³¹ Abo bashimire Uwiteka kugira neza kwe, N'imirimo itangaza yakoreye abantu.

³² Bamwogereze mu iteraniro ry'abantu, Bamushimire aho abakuru bicaranye.

³³ Ahindura imigezi ubutayu, N'amasōko ayahindura inkamīra,

³⁴ Igihugu cyera agihindura ubutaka bw'umunyu, Ku bw'ibyaha by'abahatuye.

³⁵ Kandi ahindura ubutayu ikidendezi, No mu mburamazi ahahindura amasōko.

³⁶ Aho ni ho aturiza abashonje, Kugira ngo batunganye umudugudu wo kubamo,

³⁷ Babibe imirima batere imizabibu, Bibonere imbuto z'umwero.

³⁸ Akabaha umugisha bakagwira cyane, Ntakundire inka zabo ko zigabanuka.

³⁹ Kandi iyo bagabanutse, Bagacishwa bugufi n'agahato n'ibyago n'umubabaro,

⁴⁰ Asuka igisuzuguriro ku bakomeye, Akabazerereza mu kidaturwa kitagira inzira,

⁴¹ Agashyira hejuru umukene amukuye mu makuba, Akamugwiriza imiryango nk'umukumbi.

⁴² Abakiranutsi barabireba bakishima, Ubugoryi bwose bukiziba akanwa.

⁴³ Umunyabwenge wese azitegereza ibyo, Kandi bazita ku mbabazi z'Uwiteka.