Zaburi 106 - Bibiliya Yera

¹ Haleluya! Nimushimire Uwiteka yuko ari mwiza, Kuko imbabazi ze zihoraho iteka ryose.

² Ni nde ubasha kuvuga imirimo ikomeye Uwiteka yakoze, Cyangwa kwerekana ishimwe rye ryose?

³ Hahirwa abitondera ibitunganye, Hahirwa ukora ibyo gukiranuka iminsi yose.

⁴ Uwiteka, nyibukana imbabazi ugirira abantu bawe, Ungendererane agakiza kawe,

⁵ Kugira ngo mbone intore zawe ziguwe neza, Nishimire umunezero w'ubwoko bwawe, Niratane n'umwandu wawe.

⁶ Twacumuranye na ba sogokuruza, Twarakiraniwe, twakoze ibyaha.

⁷ Ba sogokuruza ntibamenye ibitangaza byawe wakoreye muri Egiputa, Ntibibutse imbabazi zawe nyinshi, Ahubwo bagomera ku nyanja ari yo Nyanja Itukura.

⁸ Ariko ku bw'izina ryayo, Ibakiriza kugira ngo imenyekanishe imbaraga zayo zikomeye.

⁹ Ihana Inyanja Itukura irakama, Nuko ibacisha imuhengeri nko mu butayu.

¹⁰ Ibakiza ukuboko k'umwanzi wabo, Irabacungura ibakura mu kuboko k'umubisha.

¹¹ Amazi arengera ababisha babo, Ntihasigara n'umwe.

¹² Maze bizera amagambo yayo, Baririmba ishimwe ryayo.

¹³ Hahise akanya bibagirwa imirimo yakoze, Ntibarindira ko isohoza imigambi yayo.

¹⁴ Ahubwo bifuriza cyane mu butayu, Bageragereza Imana ahatagira abantu.

¹⁵ Ibaha ibyo bayisabye, Ariko imitima yabo iyishyiramo konda.

¹⁶ Kandi bagiririra Mose ishyari mu rugo rw'amahema, Na Aroni uwera w'Uwiteka.

¹⁷ Ubutaka burasama bumira Datani, Butwikīra abantu ba Abiramu.

¹⁸ Umuriro ucanwa mu iteraniro ryabo, Ikirimi cyawo gitwika abanyabyaha.

¹⁹ Baremera ikimasa i Horebu, Basenga igishushanyo kivugutiwe.

²⁰ Uko ni ko baguranye icyubahiro cyabo, Bagihindura igishushanyo cy'impfizi irya ubwatsi.

²¹ Bibagirwa Imana Umukiza wabo, Yakoreye ibikomeye muri Egiputa,

²² Yakoreye ibitangaza mu gihugu cya Hamu, N'ibiteye ubwoba ku Nyanjya Itukura.

²³ Bituma ivuga ko izabarimbura, Kandi iba yarabarimbuye, Iyaba Mose intore yayo atahagaze imbere yayo mu cyuho cy'inkike, Gukuraho umujinya wayo kugira ngo itabarimbura.

²⁴ Kandi bagaya igihugu cy'igikundiro, Ntibizera ijambo ryayo,

²⁵ Ahubwo bitotombera mu mahema yabo, Ntibumvira ijwi ry'Uwiteka.

²⁶ Bituma amanika ukuboko, Abarahira yuko azabatsinda mu butayu,

²⁷ Kandi azatsinda urubyaro rwabo mu mahanga, Akarutataniriza mu bihugu.

²⁸ Kandi bifatanya na Bālipewori, Barya intonorano z'ibitariho.

²⁹ Uko ni ko bamurakarishije imirimo yabo, Mugiga irabatungura.

³⁰ Maze Finehasi arahaguruka asohoza amateka, Mugiga irashira.

³¹ Bimuhwanirizwa no gukiranuka, Kugeza ibihe by'abantu byose iteka ryose.

³² Kandi barakariza Uwiteka ku mazi y'i Meriba, Bituma Mose aterwa ibyago na bo.

³³ Kuko bagomeye Umwuka w'Uwiteka, Bituma Mose avugisha akanwa ke ibidakwiriye.

³⁴ Kandi ntibarimbura amahanga, Uwiteka yabategetse kurimbura,

³⁵ Ahubwo bīvanga n'amahanga, Biga ingeso zayo.

³⁶ Bakoreraga ibishushanyo by'ibigirwamana byayo, Bibahindukira ikigoyi.

³⁷ Batambiraga abadayimoni abahungu babo n'abakobwa babo,

³⁸ Bavushaga amaraso y'abatariho urubanza, Ni yo maraso y'abahungu babo n'ay'abakobwa babo, Batambiye ibishushanyo by'i Kanāni, Igihugu gihumanywa n'amaraso.

³⁹ Nuko banduzwa n'imirimo yabo, Bagenda basambanisha ingeso zabo.

⁴⁰ Bituma umujinya w'Uwiteka ucanwa ku bwoko bwe, Yanga urunuka umwandu we.

⁴¹ Abashyira mu maboko y'abanyamahanga, Abanzi babo barabatwara.

⁴² Kandi ababisha babo barabahata, Baragomorwa baba munsi y'ukuboko kwabo.

⁴³ Yabakizaga kenshi, Ariko bakagomeshwa n'imigambi yabo, Bagacishwa bugufi no gukiranirwa kwabo.

⁴⁴ Ariko yitaga ku mubabaro wabo, Uko yumvaga gutaka kwabo,

⁴⁵ Akibuka isezerano yabasezeraniye, Akigarura nk'uko imbabazi ze nyinshi ziri,

⁴⁶ Agatuma bababarirwa, N'ababajyanye ho iminyago bose.

⁴⁷ Uwiteka Mana yacu udukize, Udutarurukanye udukure mu mahanga, Kugira ngo dushime izina ryawe ryera, Twishimire ishimwe ryawe.

⁴⁸ Uwiteka Imana y'Abisirayeli ahimbazwe, Uhereye kera kose ukageza iteka ryose. Kandi abantu bose bavuge bati “Amen!” Haleluya.