Zaburi 105 - Bibiliya Yera

¹ Nimushime Uwiteka mwambaze izina rye, Mwamamaze imirimo yakoze mu mahanga.

² Mumuririmbire, mumuririmbire ishimwe, Muvuge imirimo itangaza yakoze yose.

³ Mwirate izina rye ryera, Imitima y'abashaka Uwiteka yishime.

⁴ Mushake Uwiteka n'imbaraga ze, Mushake mu maso he iteka ryose.

⁵ Mwibuke imirimo itangaza yakoze, Ibitangaza bye n'amateka yo mu kanwa ke,

⁶ Mwa rubyaro rwa Aburahamu umugaragu we mwe, Mwa bana ba Yakobo mwe, abo yatoranije.

⁷ Uwiteka ni we Mana yacu, Amateka ye ari mu isi yose.

⁸ Yibuka isezerano rye iminsi yose, Ijambo yategetse aryibuka ibihe ibihumbi.

⁹ Ni ryo sezerano yasezeranye na Aburahamu, Indahiro yarahiye Isaka,

¹⁰ Akayikomereza Yakobo kuba itegeko, Ayikomereza Isirayeli kuba isezerano ridashira.

¹¹ Ati “Ni wowe nzaha igihugu cya Kanāni, Kuba umwandu ukugenewe.”

¹² Umubare wabo ukiri muke, Muke cyane na bo ari abashyitsi muri icyo gihugu,

¹³ Bazerera mu mahanga atari amwe, Bava mu bwami bajya mu bundi.

¹⁴ Ntiyakundira umuntu ko abarenganya, Yahaniye abami ko babagiriye nabi.

¹⁵ Ati “Ntimukore ku bo nasīze, Ntimugire icyo mutwara abahanuzi banjye.”

¹⁶ Ahamagara inzara ngo itere mu gihugu, Avuna inkoni yose bishingikirije, Ni yo mutsima wabo.

¹⁷ Atuma umugabo wo kubabanziriza, Ni Yosefu waguriwe kuba imbata.

¹⁸ Bababarisha ibirenge bye iminyururu, Bamushyiraho ibyuma,

¹⁹ Kugeza aho ijambo ry'Uwiteka ryasohoreye, Isezerano rye ryaramugeragezaga.

²⁰ Umwami yaratumye baramubohora, Umutegeka w'amahanga yaramurekuye.

²¹ Amugira umutware w'urugo rwe, Amubitsa ibintu bye byose,

²² Ngo abohe abakomeye be uko ashaka, Yigishe abakuru be ubwenge.

²³ Kandi Isirayeli ajya muri Egiputa, Yakobo atura mu gihugu cya Hamu.

²⁴ Kandi Uwiteka agwiza ubwoko bwe cyane, Abaha gukomera kuruta abanzi babo.

²⁵ Ahindura imitima y'abo ngabo ngo bange ubwoko bwe, Bagira ubwenge bwo kurimbura abagaragu be.

²⁶ Atuma Mose umugaragu we, Na Aroni yatoranije.

²⁷ Bashyira hagati yabo ibimenyetso bye, Bakorera ibitangaza mu gihugu cya Hamu.

²⁸ Yohereza umwijima atuma riba ijoro, Na bo ntibagomera amagambo ye.

²⁹ Ahindura amazi yabo amaraso, Yica amafi yabo.

³⁰ Igihugu cyabo cyuzura ibikeri, Mu mazu y'abami babo.

³¹ Arategeka amarumbo y'isazi araza, N'inda mu gihugu cyabo cyose.

³² Abaha urubura mu cyimbo cy'imvura, N'umuriro waka mu gihugu cyabo.

³³ Akubita imizabibu yabo n'imitini yabo, Avuna ibiti byo mu gihugu cyabo.

³⁴ Arategeka inzige ziraza, N'uburima bitabarika.

³⁵ Birya n'imboga zose zo mu gihigu cyabo, Birya imbuto z'ubutaka bwabo.

³⁶ Kandi akubita abana b'imfura bose, Bo mu gihugu cyabo arabica, Gukomera kwabo kose ni bo kwari kwatangiriyeho.

³⁷ Akuramo ba bandi, Bafite ifeza n'izahabu, Nta munyantege nke n'umwe, Wari uri mu miryango ye yose.

³⁸ Abanyegiputa bishimira kugenda kwabo, Kuko gutera ubwoba kwabo kwari kubafashe.

³⁹ Asanzura igicu cyo kubatwikīra, N'umuriro wo kubamurikira nijoro.

⁴⁰ Barasaba azana inkware, Abahaza umutsima wo mu ijuru.

⁴¹ Atobora igitare amazi aradudubiza, Atemba ahantu humye haba umugezi.

⁴² Kuko yibutse ijambo rye ryera, Na Aburahamu umugaragu we.

⁴³ Akurayo ubwoko bwe bwishimye, Intore ze azikurayo ziririmba.

⁴⁴ Abaha ubutaka bw'abanyamahanga, Batwara ibyo abanyamahanga baruhiye.

⁴⁵ Bibera bityo kugira ngo bitondere amategeko ye, Bakurikize ibyo yategetse. Haleluya.