Zaburi 104 - Bibiliya Yera

¹ Mutima wanjye, himbaza Uwiteka, Uwiteka Mana yanjye urakomeye cyane, Wambaye icyubahiro no gukomera.

² Wambara umucyo nk'umwenda, Usanzura ijuru nk'umwenda ukinze mu ihema.

³ Ashinga inkingi z'insenge ze ku mazi, Ibicu abigira igare rye, Agendera ku mababa y'umuyaga.

⁴ Agira abamarayika be imiyaga, Abagaragu be abagira umuriro waka.

⁵ Yashyiriyeho imfatiro z'isi, Kugira ngo itanyeganyega iteka.

⁶ Wayambitse inyanja nk'umwenda, Amazi atwikīra imisozi miremire.

⁷ Ahungishwa no guhana kwawe, Yirukishwa no guhinda kw'inkuba yawe,

⁸ (Imisozi ishyirwa hejuru, ibikombe birīka), Agera ahantu wayategekeye.

⁹ Wayategekeye ingabano atabasha kurenga, Kugira ngo atagaruka akarengera isi.

¹⁰ Yohereza amasōko mu bikombe, Imigezi itemba hagati y'imisozi.

¹¹ Inyobwa n'inyamaswa zose zo mu ishyamba, Imparage na zo zishira inyota.

¹² Inyoni n'ibisiga byo mu kirere biba kuri iyo migezi, Bijwigirira mu mashami.

¹³ Ivubira imisozi imvura ivuye ku nsenge ze, Ubutaka buhazwa n'imbuto z'imirimo yawe.

¹⁴ Amereza inka ubwatsi, Ameza imboga zo kugaburira abantu, Kugira ngo abakurire umutsima mu butaka,

¹⁵ Na vino yishimisha imitima y'abantu, Ngo aboneranishe mu maso habo amavuta, Kandi ngo umutsima uhe imitima y'abantu gukomera.

¹⁶ Ibiti by'Uwiteka birahaga, Imyerezi y'i Lebanoni yateye.

¹⁷ Iyo inyoni n'ibisiga byarikaho ibyari, Inzoyo ifite inzu yayo ku miberoshi.

¹⁸ Imisozi miremire ni iy'ihene zo mu ishyamba, Ibitare ni ubuhungiro bw'inkwavu.

¹⁹ Yashyiriyeho ukwezi kumenyekanisha ibihe, Izuba rizi igihe rirengera.

²⁰ Uzana umwijima rikaba ijoro, Ni bwo inyamaswa zo mu ishyamba zose zisohoka zomboka.

²¹ Imigunzu y'intare yivugira umuhīgo wayo, Ku Mana ni ho ishakira ibyokurya byayo.

²² Izuba ryarasa zikagenda, Zikaryama mu masenga yazo.

²³ Abantu bagasohoka bakajya ku mirimo yabo, No ku muruho wabo bakageza nimugoroba.

²⁴ Uwiteka, erega imirimo yawe ni iy'uburyo bwinshi! Yose wayikoresheje ubwenge, Isi yuzuye ubutunzi bwawe.

²⁵ Dore iriya nyanja nini ngari, Irimo ibigenda bitabarika, Inyamaswa ntoya n'inini.

²⁶ Ni ho inkuge zigenda, Ni ho Lewiyatani iri waremeye kuyikiniramo.

²⁷ Ibyo byose bigutegerereza, Kugira ngo ubigaburire ibyokurya byabyo igihe cyabyo.

²⁸ Biyora ibyo ubihaye, Upfumbatura igipfunsi cyawe bigahaga ibyiza.

²⁹ Uhisha mu maso hawe bigahinda imishyitsi, Ubikuramo umwuka bigapfa, Bigasubira mu mukungugu wabyo.

³⁰ Wohereza umwuka wawe bikaremwa, Ubutaka ubusubizaho ubugingo bushya.

³¹ Icyubahiro cy'Uwiteka gihoreho iteka, Uwiteka yishimira imirimo ye.

³² Ni we ureba isi igahinda umushyitsi, Akora ku misozi igacumba.

³³ Nzajya ndirimbira Uwiteka nkiriho, Nzajya ndirimbira Imana yanjye ishimwe ngifite ubugingo.

³⁴ Ibyo nibwiye biyinezeze, Nanjye nzajya nishimira Uwiteka.

³⁵ Abanyabyaha barimbuke bashire mu isi, Ababi be kubaho ukundi. Mutima wanjye, himbaza Uwiteka. Haleluya.