Zaburi 103 - Bibiliya Yera

¹ Zaburi ya Dawidi. Mutima wanjye himbaza Uwiteka, Mwa bindimo byose mwe, muhimbaze izina rye ryera.

² Mutima wanjye himbaza Uwiteka, Ntiwibagirwe ibyiza yakugiriye byose.

³ Ni we ubabarira ibyo wakiraniwe byose, Agakiza indwara zawe zose,

⁴ Agacungura ubugingo bwawe ngo butajya muri rwa rwobo, Akakwambika imbabazi no kugirirwa neza nk'ikamba,

⁵ Agahaza ubusaza bwawe ibyiza, Agatuma usubira mu busore bushya, Bumeze nk'ubw'ikizu.

⁶ Uwiteka akora ibyo gukiranuka, Aca imanza zitabera zirenganura abarenganywa.

⁷ Yamenyesheje Mose inzira ze, Imirimo ye yayimenyesheje abana ba Isirayeli.

⁸ Uwiteka ni umunyebambe n'umunyambabazi, Atinda kurakara, afite kugira neza kwinshi.

⁹ Ntakomeza kurwana iteka, Ntagumana umujinya iminsi yose.

¹⁰ Ntiyatugiriye ibihwanye n'ibyaha byacu, Ntiyatwituye ibihwanye no gukiranirwa kwacu.

¹¹ Nk'uko ijuru ryitaruye isi, Ni ko imbabazi agirira abamwubaha zingana.

¹² Nk'uko aho izuba rirasira hitaruye aho rirengera, Uko ni ko yajyanye kure yacu ibicumuro byacu.

¹³ Nk'uko se w'abana abagirira ibambe, Ni ko Uwiteka arigirira abamwubaha.

¹⁴ Kuko azi imiremerwe yacu, Yibuka ko turi umukungugu.

¹⁵ Iby'umuntu, iminsi ye imeze nk'iy'ubwatsi, Nk'ururabyo rwo ku misozi ni ko ashisha.

¹⁶ Kuko umuyaga urunyuraho rugashira, Ahantu harwo ntihazarumenya ukundi.

¹⁷ Ariko imbabazi Uwiteka agirira abamwubaha, Zahereye kera kose zizageza iteka ryose, Gukiranuka kwe kugera ku buzukuru babo.

¹⁸ Ni ko agirira abitondera isezerano rye, Bakibuka amategeko ye bakayakomeza.

¹⁹ Uwiteka yakomeje intebe ye mu ijuru, Ubwami bwe butegeka byose.

²⁰ Muhimbaze Uwiteka mwa bamarayika be mwe, Mwa banyambaraga nyinshi mwe, basohoza itegeko rye, Mukumvira ijwi ry'ijambo rye.

²¹ Muhimbaze Uwiteka, mwa ngabo ze zose mwe, Mwa bagaragu be mwe, bakora ibyo akunda.

²² Muhimbaze Uwiteka, mwa mirimo ye yose mwe, Mumuhimbarize ahantu ategeka hose. Mutima wanjye, himbaza Uwiteka.