Zaburi 102 - Bibiliya Yera

¹ Gusenga k'umunyamubabaro iyo umutima we uguye isari, agasuka amaganya ye imbere y'Uwiteka.

² Uwiteka, umva gusenga kwanjye, Gutaka kwanjye kukugereho.

³ Ntumpishe mu maso hawe ku munsi w'umubabaro wanjye, Untegere ugutwi ku munsi ntakiramo, Unsubize vuba.

⁴ Kuko iminsi yanjye ishirira mu mwotsi, Amagufwa yanjye yaka nk'urumuri.

⁵ Umutima wanjye umeze nk'ubwatsi bukubiswe urumye, Kuko nibagirwa kurya umutsima wanjye.

⁶ Ijwi ryo kuniha kwanjye, Ritumye amagufwa yanjye yumatana n'inyama yanjye.

⁷ Meze nk'uruyongoyongo rwo mu butayu, Mpindutse nk'igihunyira cyo mu misaka.

⁸ Mba maso, Mpindutse nk'igishwi kiri ku ipfundo ry'inzu cyonyine.

⁹ Abanzi banjye barantuka umunsi ukira, Abashajijwe no kundakarira bangize intukano.

¹⁰ Kuko ndya ivu nk'umutsima, Mvanga ibyo nywa n'amarira,

¹¹ Ku bw'uburakari bwawe n'umujinya wawe, Kuko wanteruye ukanta.

¹² Iminsi yanjye ihwanye n'igicucu kirehutse, Kandi numye nk'ubwatsi.

¹³ Ariko wowe Uwiteka, uzicara ku ntebe y'ubwami iteka, Urwibutso rwawe ruzahoraho ibihe byose.

¹⁴ Uzahaguruka ubabarire i Siyoni, Kuko igihe cyo kuhababarira gisohoye, Ni koko igihe cyategetswe kirasohoye.

¹⁵ Kuko abagaragu bawe bishimira amabuye yaho, Bababarira umukungugu waho.

¹⁶ Bizatuma amahanga yubaha izina ry'Uwiteka, N'abami bo mu isi bose bakubaha icyubahiro cyawe,

¹⁷ Kuko Uwiteka azaba asannye i Siyoni, Kandi abonekanye icyubahiro cy'ubwiza bwe,

¹⁸ Yitaye ku gusenga kw'abatagira shinge na rugero, Adasuzuguye gusenga kwabo.

¹⁹ Ibyo bizandikirwa ab'igihe kizaza, Ubwoko buzaremwa buzashima Uwiteka.

²⁰ Kuko azaba arebye hasi, ari hejuru ahera he, Uwiteka arebeye isi mu ijuru,

²¹ Kugira ngo yumve kuniha kw'imbohe, Abohore abategekewe gupfa,

²² Ngo abantu bogereze izina ry'Uwiteka i Siyoni, N'ishimwe rye i Yerusalemu,

²³ Ubwo amahanga n'ibihugu by'abami, Bizateranira gukorera Uwiteka.

²⁴ Yacishirije bugufi imbaraga zanjye mu nzira, Yagabanije iminsi yanjye.

²⁵ Ndavuga nti “Mana yanjye, Ntunkureho ngicagashije iminsi yanjye, Imyaka yawe ihoraho ibihe byose.

²⁶ Mbere na mbere washyizeho urufatiro rw'isi, N'ijuru ni umurimo w'intoki zawe.

²⁷ Ibyo bizashira ariko wowe ho uzahoraho, Ibyo byose bizasaza nk'umwenda, Uzabihindura nk'uko imyambaro ikuranwa, Bibe bihindutse ukundi.

²⁸ Ariko wowe ho uri uko wahoze, Imyaka y'ubugingo bwawe ntizashira.

²⁹ Abana b'abagaragu bawe bazahora mu gihugu, Urubyaro rwabo ruzakomerezwa imbere yawe.”