Yohana 17 - Bibiliya Yera

Yesu asabira abigishwa be n'abandi bose bazamwizera

¹ Yesu amaze kuvuga ibyo, yubura amaso areba mu ijuru ati “Data, igihe kirasohoye, ubahiriza Umwana wawe ngo Umwana akūbahishe,

² nk'uko wamuhaye ubutware ku bantu bose, kugira ngo abo wamuhaye bose abahe ubugingo buhoraho.

³ Ubu ni bwo bugingo buhoraho, ko bakumenya ko ari wowe Mana y'ukuri yonyine, bakamenya n'uwo watumye ari we Yesu Kristo.

⁴ Nakūbahishije mu isi, kuko narangije umurimo wampaye gukora.

⁵ Na none Data, imbere yawe unyubahirishe cya cyubahiro nahoranye ndi kumwe nawe isi itararemwa.

⁶ “Abo wampaye mu isi mbamenyesheje izina ryawe. Bari abawe urabampa, none dore bitondeye ijambo ryawe.

⁷ None bamenye yuko ibyo wampaye byose byaturutse kuri wowe,

⁸ kuko amagambo wampaye nayabahaye na bo bakayemera, bakamenya by'ukuri ko naturutse kuri wowe, bakizera kandi ko ari wowe wantumye.

⁹ “Ndabasabira. Sinsabira ab'isi, ahubwo ndasabira abo wampaye kuko ari abawe,

¹⁰ kandi ibyanjye byose ni ibyawe, n'ibyawe na byo ni ibyanjye kandi nubahirijwe muri bo.

¹¹ Jye sinkiri mu isi ariko bo bari mu isi, naho jye ndaza kuri wowe. Data Wera, ubarindire mu izina ryawe wampaye, ngo babe umwe nk'uko natwe turi umwe.

¹² Nkiri kumwe na bo, nabarindiraga mu izina ryawe wampaye. Narabarinze, muri bo nta muntu wabuze ngo arimbuke, keretse umwana wo kurimbuka ngo ibyanditswe bisohore.

¹³ Ariko none ndaza kuri wowe, kandi ibyo mbivuze nkiri mu isi, ngo bagire umunezero wanjye wuzure muri bo.

¹⁴ Nabahaye ijambo ryawe, kandi ab'isi barabanga kuko atari ab'isi, nk'uko nanjye ntari uw'isi.

¹⁵ Sinsaba ko ubakura mu isi, ahubwo ubarinde Umubi.

¹⁶ Si ab'isi nk'uko nanjye ntari uw'isi.

¹⁷ Ubereshe ukuri: ijambo ryawe ni ryo kuri.

¹⁸ Uko wantumye mu isi nanjye ni ko nabatumye mu isi,

¹⁹ kandi nanjye niyeza ku bwabo ngo na bo babe bereshejwe ukuri.

²⁰ “Sinsabira aba bonyine, ahubwo ndasabira n'abazanyizezwa n'ijambo ryabo,

²¹ ngo bose babe umwe nk'uko uri muri jye, Data, nanjye nkaba muri wowe ngo na bo babe umwe muri twe, ngo ab'isi bizere ko ari wowe wantumye.

²² Nanjye mbahaye ubwiza wampaye, ngo babe umwe nk'uko natwe turi umwe.

²³ Jyewe mbe muri bo nawe ube muri jye, ngo babe umwe rwose, ngo ab'isi bamenye ko ari wowe wantumye, ukabakunda nk'uko wankunze.

²⁴ “Data, abo wampaye ndashaka ko aho ndi na bo bahabana nanjye, ngo babone ubwiza bwanjye wampaye, kuko wankunze isi itararemwa.

²⁵ Data ukiranuka, ab'isi ntibakumenye ariko jyewe narakumenye, n'aba na bo bamenye ko ari wowe wantumye.

²⁶ Nabamenyesheje izina ryawe kandi nzaribamenyesha, ngo urukundo wankunze rube muri bo, nanjye mbe muri bo.”