Yohana 16 - Bibiliya Yera

Yesu abwira abigishwa yuko bazarenganywa

¹ “Icyo mbabwiriye ibyo ni ukugira ngo hatagira ikibagusha.

² Bazabaca mu masinagogi, kandi igihe kigiye kuza, uzabica wese azibwira ko akoreye Imana umurimo.

³ Kandi ibyo bazabikorera batyo kuko batamenye Data, nanjye ntibamenye.

⁴ Ariko ibyo mbibabwiriye kugira ngo igihe cyabyo nikigera, muzibuke ko ari jye wabibabwiye. “Uhereye mbere na mbere sinabibabwiye, kuko nari nkiri kumwe namwe.

Umumaro Umwuka Wera azabagirira

⁵ Ariko none ndajya ku Uwantumye, kandi muri mwe nta wumbaza ati ‘Urajya he?’

⁶ Ariko kuko mbabwiye ibyo, imitima yanyu yuzuye agahinda.

⁷ “Ariko ndababwira ukuri yuko ikizagira icyo kibamarira ari uko ngenda, kuko nintagenda Umufasha atazaza aho muri, ariko ningenda nzamuboherereza.

⁸ Ubwo azaza azatsinda ab'isi, abemeze iby'icyaha n'ibyo gukiranuka n'iby'amateka;

⁹ iby'icyaha, kuko batanyizeye,

¹⁰ n'ibyo gukiranuka kuko njya kwa Data, kandi namwe muzaba mutakimbona,

¹¹ n'iby'amateka kuko umutware w'ab'iyi si aciriweho iteka.

¹² “Ndacyafite ibyo kubabwira byinshi, ariko ubu ntimubasha kubyihanganira.

¹³ Uwo Mwuka w'ukuri naza azabayobora mu kuri kose kuko atazavuga ku bwe, ahubwo ibyo azumva ni byo azavuga, kandi azababwira ibyenda kubaho.

¹⁴ Uwo azanyubahiriza, kuko azenda ku byanjye akabibabwira.

¹⁵ Ibyo Data afite byose ni ibyanjye, ni cyo gitumye mvuga nti ‘Azenda ku byanjye abibabwire.’

¹⁶ “Hasigaye igihe gito ntimumbone, maze hazabaho ikindi gihe gito mumbone.”

¹⁷ Bamwe mu bigishwa be barabazanya bati “Ibyo atubwiye ni ibiki ngo ‘Hasigaye igihe gito ntimumbone, maze hazabaho igihe gito mumbone’, kandi ngo ‘Kuko njya kuri Data.’ ”

¹⁸ Kandi bati “Ibyo ni ibiki ngo ‘Igihe gito’? Ntituzi ibyo avuze.”

¹⁹ Yesu amenye ko bashaka kumubaza arababaza ati “Murabazanya ibyo mbabwiye ibyo ngo ‘Hasigaye igihe gito ntimumbone, maze hazabaho ikindi gihe gito mumbone’?

²⁰ Ni ukuri, ni ukuri, ndababwira yuko mwebweho muzarira mukaboroga, ariko ab'isi bazanezerwa. Mwebweho muzababara, ariko umubabaro wanyu uzahinduka umunezero.

²¹ Umugore iyo aramukwa arababara kuko igihe cye gisohoye, ariko iyo umwana amaze kuvuka ntaba akibuka kuribwa, kuko anejejwe n'uko umuntu avutse mu isi.

²² Ni ko namwe mubabara none, ariko nzongera kubonana namwe kandi imitima yanyu izanezerwa, n'umunezero wanyu nta muntu uzawubaka.

²³ Uwo munsi nta cyo muzambaza. Ni ukuri, ni ukuri, ndababwira yuko icyo muzasaba Data cyose mu izina ryanjye azakibaha.

²⁴ Kugeza none nta cyo mwasabye mu izina ryanjye. Musabe muzahabwa ngo umunezero wanyu ube wuzuye.

²⁵ “Ibyo mbibabwiriye mu migani, ariko igihe kizaza sinzavuganira namwe mu migani, ahubwo nzababwira ibya Data neruye.

²⁶ Uwo munsi muzasaba mu izina ryanjye, kandi simbabwira ko nzabasabira kuri Data,

²⁷ kuko Data na we abakunda ubwe kuko mwankunze mukizera yuko navuye ku Mana.

²⁸ Navuye kuri Data nza mu isi, kandi isi ndayivamo nsubire kuri Data.”

²⁹ Abigishwa baravuga bati “Dore noneho ureruye, nta mugani uduciriye.

³⁰ Ubu tuzi yuko uzi byose kandi ko utagomba ko umuntu wese agira icyo akubaza, ni cyo gituma twizera ko wavuye ku Mana.”

³¹ Yesu arabasubiza ati “None murizeye?

³² Dore igihe kirenda gusohora ndetse kirasohoye, ubwo muri butatane umuntu wese ukwe, mukansiga jyenyine. Ariko sindi jyenyine, kuko Data ari kumwe nanjye.

³³ Ibyo mbibabwiriye kugira ngo mugire amahoro muri jye. Mu isi mugira umubabaro, ariko nimuhumure nanesheje isi.”