Yohana 15 - Bibiliya Yera

Yesu acira abigishwa umugani w'umuzabibu n'amashami yawo

¹ “Ndi umuzabibu w'ukuri, kandi Data ni nyirawo uwuhingira.

² Ishami ryose ryo muri jye ritera imbuto arikuraho, iryera imbuto ryose aryanganyaho amahage yaryo ngo rirusheho kwera imbuto.

³ None mumaze kwezwa n'ijambo nababwiye.

⁴ Mugume muri jye, nanjye ngume muri mwe. Nk'uko ishami ritabasha kwera imbuto ubwaryo ritagumye mu muzabibu, ni ko namwe mutabibasha nimutaguma muri jye.

⁵ “Ni jye muzabibu, namwe muri amashami. Uguma muri jye nanjye nkaguma muri we, uwo ni we wera imbuto nyinshi, kuko ari nta cyo mubasha gukora mutamfite.

⁶ Umuntu utaguma muri jye ajugunywa hanze nk'ishami ryumye, maze bakayateranya bakayajugunya mu muriro agashya.

⁷ Nimuguma muri jye amagambo yanjye akaguma muri mwe, musabe icyo mushaka cyose muzagihabwa.

⁸ Ibyo ni byo byubahisha Data, ni uko mwera imbuto nyinshi, mukaba abigishwa banjye.

⁹ “Uko Data yankunze ni ko nanjye nabakunze. Nuko rero mugume mu rukundo rwanjye.

¹⁰ Nimwitondera amategeko yanjye muzaguma mu rukundo rwanjye, nk'uko nanjye nitondeye amategeko ya Data nkaguma mu rukundo rwe.

¹¹ “Ibyo mbibabwiriye kugira ngo umunezero wanjye ube muri mwe, kandi n'umunezero wanyu ube wuzuye.

¹² Ngiri itegeko ryanjye: mukundane nk'uko nabakunze.

¹³ Nta wufite urukundo ruruta urw'umuntu upfira incuti ze.

¹⁴ Muri incuti zanjye, nimukora ibyo mbategeka.

¹⁵ Sinkibita abagaragu kuko umugaragu atazi ibyo shebuja akora, ahubwo mbise incuti kuko ibyo numvise kuri Data byose mbibamenyesheje.

¹⁶ Si mwe mwantoranyije, ahubwo ni jye wabatoranyije kandi mbashyiriraho kugira ngo mugende mwere imbuto, imbuto zanyu zigumeho kugira ngo icyo muzasaba Data cyose mu izina ryanjye akibahe.

¹⁷ Ibyo mbibategekeye kugira ngo mukundane.

Uko ab'isi banga Yesu kandi bakanga n'abe

¹⁸ “Ab'isi nibabanga, mumenye ko babanje kunyanga batarabanga.

¹⁹ Iyo muba ab'isi, ab'isi baba babakunze. Ariko kuko mutari ab'isi, ahubwo nabatoranyije mu b'isi, ni cyo gituma ab'isi babanga.

²⁰ Mwibuke ijambo nababwiye nti ‘Umugaragu ntaruta shebuja.’ Niba bandenganyije namwe bazabarenganya, niba bitondeye ijambo ryanjye, n'iryanyu na ryo bazaryitondera.

²¹ Ariko ibyo byose bazabibagirira babahora izina ryanjye, kuko batazi Uwantumye uwo ari we.

²² Iyaba ntaje ngo mvugane na bo ntibaba bafite icyaha, ariko noneho ntibafite uko biregura icyaha cyabo.

²³ Unyanga aba yanze na Data.

²⁴ Iyaba ntakoreye muri bo imirimo itakozwe n'undi muntu, nta cyaha baba bafite. Ariko noneho barayibonye, nyamara baratwanga jyewe na Data.

²⁵ Ariko byabaye bityo kugira ngo ijambo risohore, ryanditswe mu mategeko yabo ngo ‘Banyangiye ubusa.’

²⁶ “Umufasha naza, uwo nzaboherereza ava kuri Data, ari we Mwuka w'ukuri ukomoka kuri Data, azampamya.

²⁷ Kandi namwe muzampamya, kuko uhereye mbere na mbere mwari kumwe nanjye.