Yohana 11 - Bibiliya Yera

Yesu azura Lazaro

¹ Hariho umuntu wari urwaye witwaga Lazaro w'i Betaniya, ikirorero cy'iwabo wa Mariya na Marita mwene se.

² Mariya uwo ni we wasize Umwami Yesu amavuta ku birenge akabihanaguza umusatsi we, musaza w'uwo ni Lazaro wa wundi wari urwaye.

³ Nuko bashiki be batuma kuri Yesu bati “Databuja, uwo ukunda ararwaye.”

⁴ Yesu abyumvise aravuga ati “Iyo ndwara si iyo kumwica, ahubwo ni iyo guhimbarisha Imana no gutuma Umwana w'Imana ahimbazwa.”

⁵ Yesu yakundaga Marita na mwene se na Lazaro.

⁶ Nuko yumvise ko arwaye asibira kabiri aho yari ari.

⁷ Maze iyo minsi ishize abwira abigishwa be ati “Dusubire i Yudaya.”

⁸ Abigishwa baramubaza bati “Mwigisha, amambere Abayuda bashatse kuhaguterera amabuye none usubiyeyo?”

⁹ Yesu arabasubiza ati “Mbega umunsi ntugira amasaha cumi n'abiri? Ugenda ku manywa ntasitara kuko haba habona,

¹⁰ ariko ugenda nijoro arasitara kuko haba hatabona.”

¹¹ Avuze atyo aherako arababwira ati “Incuti yacu Lazaro irasinziriye, ariko ngiye kumukangura.”

¹² Abigishwa baramubwira bati “Databuja, niba asinziriye azakira.”

¹³ Nyamara Yesu yavugaga iby'urupfu rwa Lazaro, ariko bo batekereza yuko avuze gusinzira kw'ibitotsi.

¹⁴ Yesu ni ko kuberurira ati “Lazaro yarapfuye.

¹⁵ Nanjye nezerewe ku bwanyu kuko ntari mpari, kugira ngo noneho mwizere. Nimuze tujye aho ari.”

¹⁶ Toma witwaga Didumo abwira abigishwa bagenzi be ati “Natwe tugende dupfane na we.”

¹⁷ Yesu agezeyo asanga Lazaro amaze iminsi ine mu gituro.

¹⁸ I Betaniya hari bugufi bw'i Yerusalemu, nka sitadiyo cumi n'eshanu.

¹⁹ Nuko Abayuda benshi bari baje kwa Marita na Mariya kubahumuriza, kuko musaza wabo yari yapfuye.

²⁰ Marita yumvise ko Yesu aje ajya kumusanganira, ariko Mariya asigara yicaye mu nzu.

²¹ Marita abwira Yesu ati “Databuja, iyaba wari hano musaza wanjye ntaba yarapfuye.

²² Kandi n'ubu nzi yuko ibyo usabye Imana byose, Imana izabiguha.”

²³ Yesu aramubwira ati“Musaza wawe azazuka.”

²⁴ Marita aramubwira ati “Nzi yuko azazuka mu muzuko wo ku munsi w'imperuka.”

²⁵ Yesu aramubwira ati “Ni jye kuzuka n'ubugingo, unyizera naho yaba yarapfuye azabaho,

²⁶ kandi umuntu wese ukiriho unyizera ntazapfa iteka ryose. Mbese wizeye ibyo?” s

²⁷ Aramusubiza ati “Yee, Databuja, nizeye yuko uri Kristo Umwana w'Imana ukwiriye kuza mu isi.”

²⁸ Amaze kuvuga ibyo aragenda, ahamagara mwene se Mariya rwihishwa aramubwira ati “Umwigisha yaje araguhamagara.”

²⁹ Abyumvise ahaguruka vuba aramusanga.

³⁰ Icyakora Yesu yari atarasohora mu kirorero, ahubwo yari akiri aho Marita yamusanze.

³¹ Abayuda bari bari kumwe na Mariya mu nzu bamuhoza, babonye uburyo ahagurutse vuba asohoka baramukurikira, batekereza ko agiye mu gituro kuririrayo.

³² Mariya ageze aho Yesu ari, amubonye yikubita imbere y'ibirenge bye aramubwira ati “Databuja, iyaba wari hano musaza wanjye ntaba yarapfuye.”

³³ Yesu amubonye arira, n'Abayuda bazanye na bo barira, asuhuza umutima arawuhagarika,

³⁴ arababaza ati “Mbese mwamushyize he?” Baramusubiza bati “Databuja, ngwino urebe.”

³⁵ Yesu ararira.

³⁶ Abayuda baravuga bati “Dore ye, nimurebe uburyo yamukundaga!”

³⁷ Ariko bamwe muri bo baravuga bati “Uyu ko ahumura impumyi, ntaba yarabashije kubuza n'uyu ntapfe?”

³⁸ Yesu yongera gusuhuza umutima, agera ku gituro. Cyari isenga ishyizweho igitare ku munwa.

³⁹ Yesu arababwira ati “Nimukureho igitare.” Marita mushiki w'uwapfuye aramubwira ati “Databuja, none aranuka kuko amaze iminsi ine.”

⁴⁰ Yesu aramubwira ati “Sinakubwiye nti ‘Niwizera uri bubone ubwiza bw'Imana’?”

⁴¹ Nuko bakuraho igitare. Yesu arararama aravuga ati “Data, ndagushimye kuko unyumvise.

⁴² Ubwanjye nari nzi yuko unyumva iteka, ariko mbivugiye ku bw'abantu bangose, ngo bizere yuko ari wowe wantumye.”

⁴³ Amaze kuvuga ibyo arangurura ijwi rirenga ati “Lazaro, sohoka.”

⁴⁴ Uwari upfuye arasohoka azingazingiwe mu myenda amaguru n'amaboko, n'igitambaro gipfutse mu maso he. Yesu arababwira ati “Nimumuhambure mumureke agende.”

Abayuda bajya inama yo kwica Yesu

⁴⁵ Nuko benshi mu Bayuda bari baje kwa Mariya babonye icyo akoze baramwizera,

⁴⁶ ariko abandi muri bo bajya ku Bafarisayo, bababwira ibyo Yesu yakoze.

⁴⁷ Abatambyi bakuru n'Abafarisayo bateranya urukiko, barabazanya bati “Tugire dute ko uwo muntu akora ibimenyetso byinshi?

⁴⁸ Nitumurekera dutya bose bazamwizera, kandi Abaroma bazaza barimbure umurwa wacu n'ubwoko bwacu.”

⁴⁹ Ariko umwe muri bo witwaga Kayafa, kandi wari umutambyi mukuru muri uwo mwaka arababwira ati “Nta cyo muzi.

⁵⁰ Mbese ntimutekereza yuko ari byiza ku bwacu, ko umuntu umwe yapfira abantu kuruta ko ubwoko bwose bwarimbuka?”

⁵¹ Ibyo ntiyabivuze ku bwe, ahubwo kuko yari umutambyi mukuru muri uwo mwaka, yahanuye yuko Yesu yenda gupfira ubwo bwoko,

⁵² ariko si ubwo bwoko bwonyine, ahubwo ni ukugira ngo abana b'Imana batatanye abateranirize hamwe.

⁵³ Bahera uwo munsi bajya inama zo kumwica.

⁵⁴ Nuko Yesu ntiyaba akigenda mu Bayuda ku mugaragaro, ahubwo avayo ajya mu gihugu kiri bugufi bw'ubutayu mu mudugudu witwa Efurayimu, agumanayo n'abigishwa be.

⁵⁵ Kuko Pasika y'Abayuda yendaga gusohora, benshi bava mu gihugu barazamuka bajya i Yerusalemu, Pasika itarasohora ngo biyeze.

⁵⁶ Bashaka Yesu, babazanya bahagaze mu rusengero bati “Mbese mutekereza mute? Ntazaza hano mu minsi mikuru?”

⁵⁷ Ariko abatambyi bakuru n'Abafarisayo bari bategetse yuko umuntu namenya aho ari, abibamenyesha bakamufata.