Yobu 41 - Bibiliya Yera

¹ “Umva ibyiringiro byo kuyifata ntibyabaho. Mbese umuntu ntiyazira n'uko ayirebye gusa?

² Nta ntwari yahangara kuyibyutsa, None se ni nde wabasha kumpagarara imbere?

³ Ni nde wabanje kugira icyo ampa kugira ngo mwiture? Ibiri munsi y'ijuru byose ni ibyanjye.

⁴ “Sinzareka kuvuga iby'ingingo zayo, Cyangwa ububasha bw'imbaraga zayo, Cyangwa umubyimba wayo mwiza.

⁵ Ni nde wabasha kuyambura umwambaro wayo w'inyuma? Ni nde wakwishyira mu rwasaya rwayo?

⁶ Ni nde wabasha kwasamura akanwa kayo? Amenyo yayo uko ameze atera ubwoba.

⁷ Imvuvu zayo zikomeye ni zo bwibone bwayo, Zibumbabumbiye hamwe zimeze nk'izihambiranijwe.

⁸ Ndetse rumwe rusobekerana n'urundi, Bituma ari nta mwuka uzinyuramo.

⁹ Zirasobekeranye, Zirafatanye ndetse ntabwo zatandukana.

¹⁰ Kwitsamura kwayo kuvamo umucyo, Kandi amaso yayo ameze nko gutambika k'umuseke.

¹¹ Mu kanwa kayo havamo amafumbi agurumana, Hakavamo ibishashi by'umuriro.

¹² Mu mazuru yayo hacucumuka umwotsi, Nk'uva mu nkono ibira cyangwa imbingo zitwitswe.

¹³ Umwuka wayo ukongeza amakara, Kandi mu kanwa kayo havamo ibirimi by'umuriro.

¹⁴ Mu ijosi ryayo habamo gukomera, Igitinyiro cyayo kiyihamiriza imbere.

¹⁵ Inyama zo ku mubiri wayo ziromekeranye, Ziyifasheho ntabwo zijegajega.

¹⁶ Umutima wayo ukomeye nk'ibuye, Ni ukuri ukomeye nk'urusyo.

¹⁷ Iyo yegutse intwari ziratinya, Ubwoba bukazisaza.

¹⁸ Naho hagira uyerekezaho inkota cyangwa icumu, Cyangwa umwambi cyangwa icumu ry'irihima, nta cyo byamara.

¹⁹ Ibyuma ikabireba nk'ibyatsi, Kandi umuringa ikawugereranya nk'igiti cyaboze.

²⁰ Umwambi ntiwayihungisha, Amabuye y'umuhumetso ayihindukira nk'umurama.

²¹ Ubuhiri ibureba nk'ibikūri, Iseka guhinda ku icumu.

²² Ku nda yayo ni ibivuvu bityaye, Ku byondo ihahindura ibikuruzi.

²³ Iyo igeze imuhengeri irahavuguta, Ikahahindura ifuro nk'inkono ibira, Ituma inyanja imera nk'amavuta.

²⁴ Inyuma yayo ihasiga inzira iboneye, Umuntu yatekereza ko imuhengeri hadendeje urubura.

²⁵ Nta yindi ihwanye na yo iri ku isi, Yavutse itagira ubwoba.

²⁶ Yitegereza ibiri hejuru byose, Ni yo mwami w'abana b'abibone bose.”