Yobu 40 - Bibiliya Yera

¹ Uwiteka akomeza gusubiza Yobu ati

² “Mbese umunyampaka yagisha Ishoborabyose impaka? Ugayisha Imana nasubize.”

³ Nuko Yobu asubiza Uwiteka ati

⁴ “Dore ndi insuzugurwa, nagusubiza iki? Nifashe ku munwa.

⁵ Navuze rimwe ariko sinzongera gusubiza, Ndetse kabiri ariko sinakongera.”

⁶ Maze Uwiteka asubiriza Yobu muri serwakira ati

⁷ “Noneho kenyera kigabo, Ngiye kukubaza nawe unsubize.

⁸ Mbese ugiye kumvuguruza icyo nategetse? Ugiye kumpererezaho ibyaha kugira ngo ubone urubanza?

⁹ Harya uhwanije n'Imana amaboko? Wabasha guhindisha ijwi nka yo?

¹⁰ Noneho rimbana ikuzo no kwifata neza, Kandi wiyambike icyubahiro n'ubwiza.

¹¹ Sandaza uburakari bwawe busesekare, Kandi witegereze umwibone wese umucishe bugufi.

¹² Urebe umwiraririzi umuzitse acogore, Kandi ukandagirire abanyabyaha aho bari.

¹³ Bose ubashyire mu mukungugu, Mu maso habo uhakingiranire mu bwihisho.

¹⁴ Ni bwo nzakwemera, Yuko ukuboko kwawe kw'iburyo kubasha kugukiza.

¹⁵ Nuko witegereze Behemoti iyo naremye nkawe, Irya ubwatsi nk'inka.

¹⁶ Dore itegereze imbaraga zayo ziri mu matako yayo, N'ububasha bwayo buri mu mitsi y'inda yayo.

¹⁷ Izunguza umurizo wayo nk'umwerezi, Imitsi yo mu matako yayo irasobekeranye.

¹⁸ Amagufwa yayo ameze nk'imiheha y'umuringa, Amaguru yayo ameze nk'ibihindizo by'ibyuma.

¹⁹ “Mu byaremwe n'Imana ni yo ngenzi, Umuremyi wayo ni we watinyuka kuyegera yitwaje inkota.

²⁰ Ni ukuri imisozi iyibera urwuri, Aho inyamaswa zose zo mu ishyamba zikinira.

²¹ Yiryamira munsi y'ibiti bifite ibicucu, Mu bwihisho bwo mu rufunzo no mu nkuka.

²² Ibiti bifite ibicucu biyikwizaho ibicucu byabyo, Igakikizwa n'imikingo yo ku mugezi.

²³ Dore iyo umugezi wuzuye ntiruha ihinda umushyitsi, Naho Yorodani yakuzura ikagera mu kanwa kayo ntiyabyitaho.

²⁴ Mbese hari uwayifata iri maso, Cyangwa agapfumuza izuru ryayo ikigobwe?

²⁵ “Mbese wabasha kurobesha Lewiyatani ururobo, Cyangwa gufatisha ururimi rwayo umugozi?

²⁶ Washobora gushyira umugozi mu izuru ryayo, Cyangwa gutoboza akasaya kayo ururobo?

²⁷ Mbese yagutakira cyane, Cyangwa yakubwira amagambo ashyeshya,

²⁸ Aho yasezerana nawe, Kugira ngo ikubere umugaragu iminsi yose?

²⁹ Wayikinisha nk'ukinisha inyoni? Cyangwa wayizirikira gusetsa abaja bawe?

³⁰ Abarobyi bayicuruza se? Bayigabanya abagenza?

³¹ Cyo ye wabasha kuzuza uruhu rwayo imyambi, Cyangwa umutwe wayo ibigobe?

³² Kuyibangurira ukuboko, Wibuke ko ari intambara ukugerure.