Yobu 39 - Bibiliya Yera

¹ “Mbese uzi igihe amasha yo mu bitare abyarira? Cyangwa wabasha kugaragaza igihe imparakazi ziramukwa?

² Washobora kumenya amezi zimara zihaka? Cyangwa se uzi igihe zibyarira?

³ Zirahēra zikabyara abana bazo, Kwerera kwazo kugashira.

⁴ Abana bazo barakomera bagakurira mu gasozi, Bagacuka bakigendera ntibazigarukeho.

⁵ “Ni nde washumuye imparage? Ni nde wazizituye,

⁶ Izo nahaye ubutayu ngo zibubemo, N'igihugu cy'ubukuna nkaziha ho ubuturo bwazo?

⁷ Zanga urusaku rwo mu mudugudu, Kandi ntabwo zumva urwamu rw'uziyoboye.

⁸ Zizerera mu misozi aho zirisha, Zikahuka zikajya gushaka intohera z'ubwatsi.

⁹ “Mbese imbogo yakwemera kugukorera? Cyangwa yaguma mu kiraro cyawe?

¹⁰ Wabasha kuyizirikisha umugozi ngo uyihingishe? Cyangwa yasanza mu bikombe igukurikiye?

¹¹ Wayiringira kuko imbaraga zayo ari nyinshi? Cyangwa wayiharira umurimo wawe?

¹² Wakwiringira yuko yasarura imyaka yawe, Ikayirunda ku mbuga yawe?

¹³ “Amababa y'imbuni iyakungutana ubwibone, Ariko se amababa yayo n'amoya yayo si ubwiza gusa?

¹⁴ Kuko amagi yayo iyatera ku butaka, Agashyuhira mu mukungugu,

¹⁵ Ikibagirwa yuko ikirenge cyabasha kuyahwata, Cyangwa yuko inyamaswa yabasha kuyakandagira.

¹⁶ Igirira ibyana byayo nabi nk'ibitari ibyayo, Nubwo imirimo yayo ari ubusa, Ntibiyitera ubwoba,

¹⁷ Kuko Imana yayimye ubwenge, Kandi ntiyihe kujijuka.

¹⁸ Iyo igurutse, Isuzugura ifarashi n'uyigenderaho.

¹⁹ “Mbese ni wowe wahaye ifarashi imbaraga? Cyangwa ni wowe wayiteye umugāra uhungabana ku ijosi ryayo?

²⁰ Ni wowe wayihaye gusimbuka nk'inzige? Ubwiza bwo kwivuga kwayo butera ubwoba,

²¹ Ikaraha mu gikombe ikishimira imbaraga zayo, Ikajya gusanganira ingabo.

²² Isuzugura ubwoba nta cyo itinya, Ndetse ntabwo ihindukira ngo ihunge inkota.

²³ Ikirimba kijegerera hejuru yayo, Umuheto n'icumu rirabagirana, n'agacumu.

²⁴ Uburakari bwayo bukaze butuma iyogoza isi, Kandi iyo yumvise ijwi ry'impanda ntirituma ihagarara.

²⁵ Iyo yumvise impanda hose irivuga, Kandi ikarehera intambara ikiri kure, Guhinda kw'abagaba n'urusaku.

²⁶ “Mbese agaca kagurukishwa n'ubwenge bwawe, Iyo karamburiye amababa yako aherekeye ikusi?

²⁷ Igisiga gitumbagira ku itegeko ryawe, Rikaba ari ryo rituma cyarika hejuru?

²⁸ Kiba mu bitare kikarikaho, No mu bihanamanga mu masenga yabyo.

²⁹ Gihigisha ijisho ryacyo rishaka icyo gifata, Amaso yacyo akabibona biri kure.

³⁰ N'ibyana byacyo binyunyuza amaraso, Kandi aho intumbi ziri ni ho kijya.”