Yobu 37 - Bibiliya Yera

¹ “Ni ukuri ibyo bitera umutima wanjye guhinda umushyitsi, Umutima ugakuka.

² Nimwumve yemwe nimwumve urusaku rw'ijwi ryayo, No guhinda kuva mu kanwa kayo.

³ Umuhindo waryo iwukwiza munsi y'ijuru hose, N'umurabyo wayo ikawugeza ku mpera z'isi.

⁴ Hanyuma yayo ijwi rikaririma, Igahindisha ijwi ry'icyubahiro cyayo, N'iyo iranguruye ijwi irekura imvura ikagwa.

⁵ Imana ihindisha ijwi ryayo bitangaje, Ikora ibikomeye tutabasha gusobanura.

⁶ Kuko ibwira shelegi iti ‘Gwa ku isi’, N'imvura yamagira na yo ikayibwira ityo, Ndetse n'imvura y'umurindi.

⁷ Igaganyaza amaboko y'abantu bose, Kugira ngo abo yaremye bose babimenye.

⁸ Kandi inyamaswa zigasesera mu bwihisho, Zikaguma mu burumba bwazo.

⁹ Umugaru urahindura uturutse ikusi, N'imbeho igaturuka ikasikazi.

¹⁰ Iyababa izanwa n'umwuka wo mu kanwa k'Imana, Maze amazi adendeje agafatana.

¹¹ Ni ukuri itwaza ibicu bya rukokoma amazi, Isanza ibicu birimo umurabyo wayo.

¹² Kandi irabiyobora bigakomeza kubunga, Kugira ngo bikore icyo ibitegetse cyose, Biri hejuru y'isi ituwemo n'abantu.

¹³ Igituma ibizana, Ni ukubihanisha igihugu cyayo no kukigirira ibambe.

¹⁴ “Umva ibi yewe Yobu, Hagarara witegereze imirimo y'Imana itangaza.

¹⁵ Mbese uzi uko Imana iyisohoza, Kandi uko itegeka umurabyo w'igicu cyayo kurabya?

¹⁶ Cyangwa se uzi uko ibicu bireretse, Yuko ari ibitangaza by'Iyo ifite ubwenge butunganye?

¹⁷ Ntuzi ko imyambaro yawe isusuruka, Iyo umuyaga w'ikusi woroshye mu gihugu?

¹⁸ Ese wabasha kubamba ijuru ufatanije n'Imana? Ko rikomeye nk'indorerwamo iyagijwe!

¹⁹ Utwigishe icyo dukwiriye kuyibwira, Kuko umwijima ari wo utubuza kubitunganya.

²⁰ Mbese yabwirwa ko nshaka kuvugana na yo? Cyangwa se hariho umuntu wakwifuza kumirwa bunguri?

²¹ “Kandi n'ubu abantu ntibareba umucyo urabagiranira mu ijuru, Ariko umuyaga urahita ukeyura ibicu.

²² Ubwiza buhebuje bugaturuka ikasikazi, Imana ifite ubwiza buteye ubwoba.

²³ Ishoborabyose ntabwo twabasha kuyishyikira, Ifite ububasha buhebuje, Kandi igira imanza zitabera no gukiranuka kwinshi, Nta bwo irenganya.

²⁴ Ni cyo gituma abantu bayubaha, Ntabwo yita ku bantu bīgize abanyabwenge.”