Yobu 36 - Bibiliya Yera

¹ Elihu akomeza kuvuga ati

² “Ba unyoroheye gato maze nkwereke, Kuko ngifite icyo mvugira Imana.

³ Ndazana ubwenge bwanjye mbukuye kure, Kandi ndātūrira Umuremyi wanjye uburyo akiranuka.

⁴ Ni ukuri ibyo mvuga ntabwo ari ibinyoma, Umuntu ufite ubwenge butunganye ari kumwe nawe.

⁵ “Dore Imana irakomeye kandi ntigira uwo ihinyura, Irakomeye mu mbaraga no mu bwenge.

⁶ Ntiramisha umunyabyaha, Ariko itsindishiriza abarengana.

⁷ Ntabwo ivana amaso yayo ku bakiranutsi, Ahubwo ibicaza hamwe n'abami ku ntebe zabo, Ikabakomeza iteka ryose bagashyirwa hejuru.

⁸ Kandi iyo baboheshejwe iminyururu, Bagafatishwa ingoyi z'umubabaro,

⁹ Ibereka imirimo yabo n'ibicumuro byabo, Uko bagenje bibona.

¹⁰ Kandi izibura amatwi yabo ngo bumve ibyigisho, Ikabihanangiriza kuva mu byaha.

¹¹ Nibayumvira bakayikorera, Bazamara iminsi yabo baguwe neza, Bazamara n'imyaka yabo mu byishimo.

¹² Ariko nibatumvira bazarimbuzwa inkota, Kandi bazapfa ari nta bwenge bafite.

¹³ “Kandi abatubaha Imana mu mitima yabo bibikira uburakari, Iyo ibaboshye ntibarushya batabaza.

¹⁴ Bapfa bakenyutse, Kandi ubugingo bwabo buherera mu banduye.

¹⁵ Irokora abarengana ikabakura mu makuba, Kandi akarengane gatuma ibaziburira amatwi.

¹⁶ “Ni ukuri iba yaragukuye mu makuba, Ikagushyira ahagari hadafunganye, Kandi ibishyizwe ku meza yawe, Biba byuzuwemo n'ibinure.

¹⁷ Ariko wuzuwemo n'imanza z'abanyabyaha, Urubanza no gukiranuka biragufashe.

¹⁸ Hariho uburakari. Wirinde utayobeshwa no kwirarira kwawe, Bigatuma incungu nyinshi zinanirwa kugucungura.

¹⁹ Mbese ubutunzi bwawe n'ububasha bw'imbaraga zawe bwose, Byatuma utabona amakuba?

²⁰ Ntukifuze ijoro, Igihe abantu bacibwa bakava iwabo.

²¹ Itonde we kwibwira ibyo gukiranirwa, Kuko ari byo wahisemo bikakurutira umubabaro ufite.

²² “Dore Imana ikoresha ibikomeye ububasha bwayo, Umwigisha uhwanye na yo ni nde?

²³ Ni nde wayitegekeye inzira zayo? Cyangwa ni nde wavuga ati ‘Wakoze ikitaboneye’?

²⁴ Ibuka gushimisha imirimo yayo, N'ibyayo abantu baririmbaga.

²⁵ Bose barayirebaga, Umuntu ayitegereza ari kure yayo.

²⁶ Dore Imana irakomeye kandi ntituyizi, Imibare y'imyaka yayo ntibarika.

²⁷ “Kuko izamura amazi akaba igicu, Kigahinduka imvura itonyanga,

²⁸ Maze ibicu bikayigusha, Ikagwa mu gihugu ari nyinshi.

²⁹ Mbese hari uwabasha kumenya uko ibicu bikwira hose, Akamenya n'uko imihindaganyo iva mu ihema ryayo?

³⁰ Dore yigotesha umucyo, Kandi itwikīra no mu kuzimu kw'inyanja.

³¹ Kuko ibyo ari ibyo ikirisha urubanza rw'amahanga, Kandi itanga ibyokurya byinshi.

³² Ihisha umurabyo mu maboko yayo, Maze ikawutegeka guhamya intego.

³³ Guhinda kw'inkuba kugaragaza ibyayo, Amatungo na yo akamenya yuko umugaru uhinduye.