Yobu 34 - Bibiliya Yera

¹ Maze Elihu yongera kuvuga ati

² “Nimwumve ibyo mvuga mwa banyabwenge mwe, Namwe abajijutse muntegere amatwi,

³ Kuko ugutwi gusobanura amagambo, Nk'uko akanwa kumva ibyokurya.

⁴ Twihitiremo igitunganye, Twimenyere icyiza turi kumwe.

⁵ “Yobu yavuze ati ‘Ndi umukiranutsi, Kandi Imana yankuyeho ibyari binkwiriye.

⁶ Nubwo nta rubanza rundiho mbarwa nk'umubeshyi, Uruguma rwanjye rurenze urukiriro, Nubwo nta gicumuro mfite.’

⁷ Mbese hariho umuntu umeze nka Yobu, Unywa gukobwa nk'ugotomera amazi?

⁸ Agenda yibanisha n'inkozi z'ibibi, Kandi akagendana n'abanyabyaha.

⁹ Kuko yavuze ati ‘Nta cyo bimariye umuntu kwishimana Imana.’

¹⁰ “Nuko rero nimuntegere amatwi, Mwa bantu bajijutse mwe, Ntibikabeho ko Imana ikora ibyaha, N'Ishoborabyose ngo ikore ibyo gukiranirwa,

¹¹ Kuko izitūra umuntu ibihwanye n'umurimo we, Izaha umuntu wese kubona ibihwanye n'imigenzereze ye.

¹² Ni ukuri ntabwo Imana yakora ibibi, Kandi Ishoborabyose ntiyagoreka imanza.

¹³ Ni nde wayihaye gutwara isi? Cyangwa ni nde wayiringanirije ibyaremwe byose?

¹⁴ Yakwitegereza abantu, Ikisubiranira umwuka no guhumeka byayo,

¹⁵ Ibyaremwe byose byapfira rimwe, Umuntu na we agasubira mu mukungugu.

¹⁶ “Noneho niba ujijutse umva ibi, Utegere amatwi ijwi ry'amagambo yanjye.

¹⁷ Mbese uwanga gukiranuka yategeka? Wacira Ikiranuka kandi Ikomeye urubanza?

¹⁸ Birakwiriye se kubwira umwami uti ‘Uri mubi’? Cyangwa ab'imfura uti ‘Muri babi’?

¹⁹ Nkanswe kubibwira Imana itarobanura abami ku butoni, Ntiyite ku batunzi kubarutisha abakene, Kuko bose ari bo yaremesheje amaboko yayo.

²⁰ Bapfa mu kanya gato ndetse mu gicuku, Abantu baradandabirana bakagendanirako, Kandi intwari zikurwaho ari nta muntu zizize.

²¹ “Kuko amaso yayo ari ku migenzereze y'umuntu, Kandi ireba amajya ye yose.

²² Nta mwijima cyangwa igicucu cy'urupfu, Aho inkozi z'ibibi zishobora kwihisha.

²³ Kuko itagomba kongera kwitegereza umuntu, Kugira ngo yirirwe isubira mu rubanza.

²⁴ Ivunagura intwari mu buryo butarondoreka, Igashyira abandi mu kigwi cyazo.

²⁵ Kuko izi imirimo yazo, Kandi izubika nijoro zikarimbuka.

²⁶ Izikubita nk'abantu babi, Ku mugaragaro imbere y'abandi barora,

²⁷ Kuko zayiteshutse, Ntizite ku nzira zayo zose.

²⁸ Bagatuma gutaka kw'abakene kuyigeraho, Kandi ikumva gutaka kw'abarengana.

²⁹ “Iyo itanze amahoro ni nde wabasha gutera amahane? Iyo yitwikiriye ni nde wabasha kuyireba? Uko yagira benshi ni ko yagira n'umwe,

³⁰ Kugira ngo utubaha Imana atima, Kandi ngo hatagira utega abantu umutego.

³¹ “Hari uwabwiye Imana ati ‘Narahanwe sinzongera gucumura,

³² Icyo ntabonye ukinyigishe, Niba narakoze ikibi sinzongera kugikora.’

³³ Mbese ingororano yayo uyangishwa n'uko idakora icyo ushaka? Kuko ari wowe ukwiriye guhitamo atari jye, Nuko vuga icyo uzi.

³⁴ “Abantu bajijutse, Ndetse abantu bose bazi ubwenge banyumva, Bazambwira bati

³⁵ ‘Yobu yavuze icyo atazi, Kandi amagambo ye ntiyarimo ubwenge.’

³⁶ “Icyampa Yobu akageragezwa akazagezwa ku maherezo, Kuko asubiza nk'abanyabyaha.

³⁷ Kuko yongera ubugome ku cyaha cye, Agakoma mu mashyi muri twe atangara, Akagwiza amagambo ye yibasiye Imana.”