Yobu 33 - Bibiliya Yera

¹ “Nuko rero Yobu, ndakwinginze wumve ibyo mvuga, Kandi utegere amatwi amagambo yanjye yose.

² Dore ubu mbumbuye umunwa wanjye, Ururimi rwanjye ruvugiye mu kanwa kanjye.

³ Amagambo yanjye agaragaze gutungana k'umutima wanjye, Kandi ibyo nzi ururimi rwanjye rurabivuga ntafite uburyarya.

⁴ Mwuka w'Imana ni we wandemye, Kandi guhumeka kw'Ishoborabyose ni ko kwambeshejeho.

⁵ “Nubishobora unsubize, Amagambo yawe uyatunganirize imbere yanjye, Uhagarare ushikamye.

⁶ Dore mpwanye nawe imbere y'Imana, Nanjye nabumbwe mu gitaka.

⁷ Umva igitinyiro cyanjye ntikizagutinyisha, Kandi ukuboko kwanjye ntikuzakuremerera.

⁸ “Ni ukuri wavuze numva, Kandi numvise amagambo y'ijwi ryawe uti

⁹ ‘Ndaboneye nta gicumuro mfite, Nta rubanza rundiho kandi nta kibi kindimo.

¹⁰ Ariko rero Inshakaho impamvu, Indebaho nk'umwanzi wayo.

¹¹ Ibirenge byanjye ibishyira mu mbago, Yitegereza inzira zanjye zose.’

¹² “Reka ngusubize, muri ibyo ntukiranutse, Kuko Imana isumba abantu.

¹³ Ni iki gituma uyigisha impaka, Kuko itagomba gusobanura ibyayo?

¹⁴ Imana ivuga rimwe, Ndetse kabiri nubwo umuntu atabyitaho.

¹⁵ Mu nzozi mu iyerekwa rya nijoro, Igihe abantu bashyizweyo, Basinziriye ku mariri yabo.

¹⁶ Ni ho yumvisha amatwi y'abantu, Igashyira ikimenyetso ku byo ibigisha,

¹⁷ Kugira ngo igamburuze umuntu mu migambi ye, Ngo imaremo umuntu ubwibone bwe buhishwe.

¹⁸ Ubugingo bwe iburinda rwa rwobo, No kubaho kwe ikakurinda kurimburwa n'inkota.

¹⁹ Maze kandi ahanwa n'umubabaro ari ku buriri bwe, Ahora aribwa mu magufwa ntahweme,

²⁰ Bigatuma ubugingo bwe buhurwa ibyokurya, N'umutima we ukanga ibiryoshye.

²¹ Umubiri we urananuka ntube ukigaragara, N'amagufwa ye atagaragaraga akānama.

²² Ni ukuri ubugingo bwe bwegera ikuzimu, No kubaho kwe kwerekeye ku barimbuzi.

²³ “Niba abonekerwa na marayika w'umurengezi, Ni inyamibwa imwe mu gihumbi, Wamenyesha umuntu inzira akwiriye kunyuramo.

²⁴ Ni ho Imana yamubabarira iti ‘Murokore kugira ngo atamanuka akajya muri rwa rwobo, Nabonye Umucunguzi.’

²⁵ Umubiri we uzagwa itoto birushe uw'umwana, Asubire mu busore bwe.

²⁶ Asaba Imana na yo ikamugirira ibambe, Bituma ayireba mu maso anezerewe, Kandi igarurira umuntu gukiranuka kwe.

²⁷ Aririmbira imbere y'abantu ati ‘Naracumuye nkagoreka ibyari bigororotse, Ariko nta cyo byamariye.

²⁸ Nyamara yancunguriye ubugingo ngo butajya muri rwa rwobo, Kandi kubaho kwanjye kuzareba umucyo.’

²⁹ “Dore ibyo byose bikorwa n'Imana, Igenza ityo umuntu kabiri ndetse gatatu,

³⁰ Kugira ngo igarure ubugingo bwe ngo butajya ikuzimu, Abone kumurikirwa n'umucyo w'abazima.

³¹ “Huguka cyane Yobu we, untegere amatwi, Uceceke nanjye mvuge.

³² Niba ufite icyo kuvuga unsubize, Vuga kuko nifuza kugutsindishiriza.

³³ Niba ari nta cyo untegere amatwi, Ceceka nanjye nkwigishe ubwenge.”