Yobu 32 - Bibiliya Yera

Ibya Elihu

¹ Nuko abo bantu uko ari batatu barorera gusubiza Yobu, kuko yari yiyizi yuko ari umukiranutsi.

² Maze uburakari bwa Elihu mwene Barakeli w'Umubuzi wo mu muryango wa Ramu burabyuka, bukongera Yobu kuko yihaye gukiranuka kurusha Imana.

³ Kandi arakarira na bagenzi be batatu, kuko batabonye icyo bamusubiza kandi bakagaya Yobu.

⁴ Ariko Elihu yari yarindiriye kuvugana na Yobu, kuko bamurutaga ubukuru.

⁵ Maze Elihu abonye yuko abo bantu babuze icyo bamusubiza, uburakari bwe burabyuka.

⁶ Nuko Elihu mwene Barakeli w'Umubuzi aravuga ati “Ndi muto namwe muri abasaza, Ni cyo cyatumye ntinya, Sintinyuke kubamenyesha icyo nibwira.

⁷ Naravuze nti ‘Abafite iminsi ni bo bakwiriye kuvuga, Abamaze imyaka myinshi ni bo bakwiriye kwigisha ubwenge.’

⁸ Ariko mu bantu harimo umwuka, Kandi guhumeka kw'Ishoborabyose ni ko kubaha kujijuka.

⁹ Abakuze si bo bazi ubwenge, N'abasaza si bo bamenya imanza.

¹⁰ Ni cyo gitumye mvuga nti ‘Nimuntegere amatwi, Nanjye mbumvishe icyo nibwira.

¹¹ Dore narindiriye amagambo yanyu, Mugitekereza ibyo kuvuga, Ngira ngo nze kumva impamvu zanyu.’

¹² Ni ukuri nahugukiye kubumva, Ariko nta n'umwe muri mwe wemeje Yobu, Cyangwa ngo amusubize ku byo yavuze.

¹³ Mwitonde kugira ngo mutavuga muti ‘Ni twe twaronse ubwenge, Nta muntu wamutsinda yatsindwa n'Imana.’

¹⁴ Si jye yerekejeho amagambo ye, Nanjye sinamusubiza amagambo nk'ayanyu.

¹⁵ “Barumirwa ntibongera gusubiza, Ntibagira ijambo bavuga.

¹⁶ Mbese mpore kuko nta cyo bavuga, Kuko bahagaze ntibongere gusubiza?

¹⁷ Jyeho ngiye gusubiza, Ngiye kuvuga icyo ntekereza.

¹⁸ Kuko amagambo anyuzuyemo, Umutima undimo uraniga.

¹⁹ Dore igituza cyanjye kimeze nka vino idafite aho ibirira, Nk'intango nshya igiye guturika.

²⁰ Ngiye kuvuga kugira ngo noroherwe, Ngiye kubumbura akanwa kanjye musubize.

²¹ Ne kurobanura abantu ku butoni, Cyangwa kugira uwo nshyeshya.

²² Kuko ntazi gushyeshya, Nashyeshya Umuremyi wanjye yankuraho bidatinze.