Yobu 30 - Bibiliya Yera

¹ “Ariko noneho abo nduta ubukuru, Kuri ubu ni bo bampinduye ibitwenge, Ndetse na ba se nagayaga simbegereze n'imbwa zirinda umukumbi wanjye.

² Ni ukuri imbaraga z'amaboko yabo zamarira iki, Ko ari abantu b'indogore batazarama?

³ Bahoroteshejwe n'ubukene n'inzara, Baguga umukungugu ahatabona mu bisanze no mu bigugu.

⁴ Batungwa n'intārano zo mu bihuru, Kandi bahonda inguri ho ibyokurya byabo.

⁵ Bagacibwa mu bantu, Bahabwa induru nk'ibisambo,

⁶ Bigatuma batura mu mikoke, Mu myobo yo mu butaka no mu masenga.

⁷ Basakuriza mu bihuru, Biryamira hamwe munsi y'ibisura.

⁸ Ni abana b'abapfapfa, ni ukuri ni abana b'abatindi, N'ibicibwa mu gihugu.

⁹ “Noneho mpindutse imbyino yabo, Ni ukuri ndi iciro ry'imigani yabo.

¹⁰ Baranzinutswe baranyitaruye, Kandi ntibatinya kuncira mu maso.

¹¹ Ubwo Imana yaregūye injishi y'umuheto wayo ikambabaza, Ni cyo gituma bareka kwifata kose imbere yanjye.

¹² Iburyo bwanjye hahaguruka igitero, Basunika ibirenge byanjye, Bantegesha inzira zabo zirimbura.

¹³ Inzira yanjye barayica, Batebutsa amakuba yanjye ari abatagira gitabara.

¹⁴ Baje nk'abanyuze mu cyuho kinini, Bansumirira mu mivurungano.

¹⁵ Ibiteye ubwoba binyerekeyeho, Icyubahiro cyanjye cyagiye nk'umuyaga, Kandi guhirwa kwanjye gutamurutse nk'igicu.

¹⁶ “Ubu ubugingo bwanjye bunshongeyemo, Iminsi y'umubabaro yanshyikiriye.

¹⁷ Amagufwa yanjye yampinguranije nijoro, Kandi sintuza kuribwa ngo noroherwe.

¹⁸ Ku bw'imbaraga z'indwara yanjye, Umwambaro wanjye urahinyaraye, Urankanaga nk'ijosi ry'umwambaro wanjye.

¹⁹ Yanjugunye mu byondo, Mpinduka nk'umukungugu n'ivu.

²⁰ “Ndagutakira nyamara ntunsubiza, Nahagarara ukantumbira.

²¹ Wampindukiye inkazi, Undeganisha imbaraga zose z'ukuboko kwawe.

²² Unteruza umuyaga ugatuma njyanwa na wo, Kandi umpinduza ubusa umugaru.

²³ Nzi ko uzangeza ku rupfu, Mu nzu itegekewe abazima bose.

²⁴ Ariko se umuntu ugiye kugwa ntiyarambura ukuboko? No mu makuba ye ntiyatabaza ku bw'ibyo?

²⁵ Mbese sinaririye uwari mu makuba, Umutima wanjye nturagaterwa agahinda n'umukene?

²⁶ Iyo nategerezaga ibyiza hazaga ibibi, Nategerezaga umucyo hakaza umwijima.

²⁷ Mu nda yanjye harabirindurwa ntihagire ituze, Iminsi y'imibabaro ingezeho.

²⁸ Ngenda nsuherewe singira izuba, Mpagarara mu iteraniro nkavuza induru.

²⁹ Ndi umuvandimwe w'imbwebwe, N'incuti y'imbuni.

³⁰ Umubiri wanjye urirabuye unyomotseho, N'amagufwa yanjye yokejwe n'ubushyuhe.

³¹ Ni cyo gitumye inanga yanjye na yo iboroga, N'umwironge ukagira ijwi ry'abarira.