Yobu 29 - Bibiliya Yera

¹ Maze Yobu yongera guca imigani ye ati

² “Iyaba nari meze nko mu bihe bya kera, Nko mu minsi Imana yandindaga!

³ Icyo gihe itabaza ryayo ryamurikiraga ku mutwe, Nkagendera mu mwijima nyobowe n'umucyo wayo,

⁴ Nk'uko nari meze mu minsi y'ubukwerere bwanjye, Imana ikingīra inama mu rugo rwanjye.

⁵ Ishoborabyose yari ikiri kumwe nanjye, Abana banjye bankikije.

⁶ Intambwe zanjye zari zaranyuzwe n'amavuta, Urutare rukansukira imigezi y'amavuta ya elayo.

⁷ Iyo najyaga ku irembo ry'umudugudu, Ngatereka intebe yanjye mu muharuro,

⁸ Abasore barambonaga bakihisha, Na bo abasaza bakampagurukira bagahagarara.

⁹ Ibikomangoma byaracecekaga, Bikifata ku munwa.

¹⁰ Ijwi ry'imfura ryaroroshywaga, Ururimi rwazo rugafatana n'urusenge rw'akanwa kabo.

¹¹ “Ugutwi kwanyumvaga kwanyitaga uhiriwe, N'ijisho ryambonaga ryamberaga umuhamya,

¹² Yuko nakizaga umukene utaka, N'impfubyi na yo itagira gifasha.

¹³ N'uwendaga gupfa wese yansabiraga umugisha, Kandi ngatuma umutima w'umupfakazi uririmbishwa no kunezerwa.

¹⁴ Nambaraga gukiranuka kukanyambika, Kutabera kwanjye kwari kumeze nk'umwitero n'ikamba.

¹⁵ Nari amaso y'impumyi n'ibirenge by'ikirema,

¹⁶ Nari se w'umukene, Ngakurikirana urubanza rw'uwo nari ntazi.

¹⁷ Navunaga inzasaya z'umunyabyaha, Nkamushikuza umunyago mu menyo ye.

¹⁸ “Maze nkavuga nti ‘Nzapfira mu rugo rwanjye, Kandi nzagwiza iminsi yanjye ingane n'imisenyi.

¹⁹ Umuzi wanjye wari ushoreye mu mazi, N'ikime cyatondaga ku ishami ryanjye bukarinda bucya.

²⁰ Ubwiza bwanjye bwahoraga bwiyuburura, Umuheto wanjye ugakomerera mu ntoki zanjye.’

²¹ Abantu bantegeraga amatwi bagategereza, Bagaceceka ngo bumve inama yanjye.

²² Iyo namaraga kuvuga nta cyo basubizaga, Ibyo mvuze bikabatonyangaho.

²³ Kandi bantegerezaga nk'imvura, Bakasama nk'abasamira imvura y'itumba.

²⁴ N'iyo twahuzaga urugwiro na bo nseka, Ntibakundaga kubyemera, Kandi ntabwo bahinduraga umucyo wo mu maso hanjye.

²⁵ Nakundaga kujya mu nzira yabo nkababera umutware, Nkabamerera nk'umwami mu ngabo ze, Nk'umuhumuriza w'ababoroga.