Yobu 28 - Bibiliya Yera

¹ “Ni ukuri ifeza igira urwobo yavuyemo, N'izahabu ikagira uruganda icurirwamo.

² Ubutare bukurwa mu butaka, N'ibuye riyengeshejwe rivamo umuringa.

³ Umuntu amaraho umwijima akawugenzura, Akagera mu maherezo y'urugabano, Akurikiranye amabuye ari mu mwijima no mu gicucu cy'urupfu.

⁴ Acukura urwobo kure y'aho abantu batuye, Bakitendeka muri rwo kure y'abantu, Ntibahashinge ikirenge bakanagana hirya no hino.

⁵ Isi na yo ivamo ibyokurya, Kandi ikuzimu hayo habirindurwa nk'ahari umuriro.

⁶ Amabuye y'aho avamo safiro, Arimo umukungugu w'izahabu.

⁷ Iyo nzira nta gisiga kiyizi, N'ijisho ry'ikizu ntiryigeze kuyibona,

⁸ N'inyamaswa zībona ntabwo zayikandagiyemo, N'intare y'inkazi ntiyayinyuzemo.

⁹ “Umuntu arambura ukuboko kwe ku rutare rw'isarabwayi, Yubika imisozi ahereye mu mizi yayo.

¹⁰ Aca imikorogero mu bitare, Kandi ijisho rye ribona ibifite igiciro cyinshi byose.

¹¹ Agomera imigezi ntitembe, Kandi agaragaza icyari gihishwe.

¹² Ariko ubwenge bwo buzabonwa he? Cyangwa kumenya kuba hehe?

¹³ “Umuntu ntazi igiciro cyabwo, Kandi ntibubonwa mu gihugu cy'abazima.

¹⁴ Imuhengeri haravuga hati ‘Ntibundimo’, N'inyanja iti ‘Ntiburi kumwe nanjye.’

¹⁵ Ntibuboneshwa n'izahabu, Kandi nta feza igererwa kuba ikiguzi cyabwo.

¹⁶ Ntabwo bugereranywa n'izahabu ya Ofiri, Cyangwa shohamu y'igiciro cyinshi, habe na safiro.

¹⁷ Izahabu n'ibirahuri ntibihwanye na bwo, Kandi ntibwaguranwa ibyambarwa by'izahabu nziza.

¹⁸ Fezaruka n'ibirahuri ntibizavugwa, Ni ukuri igiciro cy'ubwenge kiruta marijani.

¹⁹ Topazi yo muri Etiyopiya ntabwo ihwanye na bwo, Kandi ntabwo bwagereranywa n'izahabu nziza.

²⁰ “None se ubwenge bukomoka he? No kumenya kuba hehe?

²¹ Ko buhishwe amaso y'abazima bose, Bukihisha inyoni zo mu kirere?

²² Kirimbuzi n'urupfu biravuga biti ‘Amatwi yacu ni yo twumvishije impuha zabwo.’

²³ “Imana ni yo izi inzira yabwo, Kandi izi n'aho buba.

²⁴ Kuko ireba ku mpera z'isi, Ikareba no munsi y'ijuru hose,

²⁵ Kugira ngo igere uburemere bw'umuyaga, Ni ukuri amazi iyageresha incuro.

²⁶ Igihe yahereye imvura itegeko, N'umurabyo w'inkuba ikawuha inzira,

²⁷ Ni bwo yabubonye ikabugaragaza, Yarabukomeje ndetse iraburondora.

²⁸ “Maze ibwira umuntu iti ‘Dore kubaha Uwiteka ni bwo bwenge Kandi kuva mu byaha ni ko kujijuka.’ ”