Yobu 27 - Bibiliya Yera

¹ Maze Yobu akomeza guca imigani ye ati

² “Ndarahira Imana ihoraho, Ari yo yanyimye ibyari binkwiriye, N'Ishoborabyose yababazaga ubugingo bwanjye.

³ Ubugingo bwanjye buracyari buzima, Kandi Umwuka w'Imana ni we utuma mpumeka.

⁴ Ni ukuri iminwa yanjye ntizavuga ibyo gukiranirwa, N'ururimi rwanjye na rwo ntiruzariganya.

⁵ Ntibikabeho yuko nabemerera ngo muvuze ibitunganye, Kugeza ubwo nzapfa sinzikuraho kuba inyangamugayo.

⁶ “Gukiranuka kwanjye ndagukomeje ntabwo nzakurekura, Ntabwo umutima wanjye uzagira icyo unshinja nkiriho.

⁷ “Umwanzi wanjye namere nk'umunyabyaha, N'unyibasiye amere nk'ukiranirwa.

⁸ Noneho utubaha Imana agira byiringiro ki, Iyo Imana imuciye ikamwaka ubugingo bwe?

⁹ Mbese Imana yakumva gutaka kwe, Ibyago nibimutera?

¹⁰ Cyangwa se yakwishimira Ishoborabyose, Akajya atabaza Imana ibihe byose?

¹¹ “Nzabigisha iby'ukuboko kw'Imana, Ntabwo nzabahisha iby'Ishoborabyose.

¹² Dore mwese mwarabyirebeye, None se ni iki gitumye muba ab'ubusa gusa?

¹³ “Uwo ni wo mugabane umunyabyaha abikiwe n'Imana, N'ibizaba ku barenganya bagenewe n'Ishoborabyose.

¹⁴ Abana be nibororoka bazaba abo kugabizwa inkota, Kandi urubyaro rwe ntiruzahazwa n'ibyokurya.

¹⁵ Abe basigaye bazamirwa n'urupfu, Kandi abapfakazi be ntibazabaririra.

¹⁶ Nubwo arundanya ifeza nk'umukungugu, Akirundaniriza imyambaro nk'urwondo,

¹⁷ Abasha kuyirundanya ariko izambarwa n'umukiranutsi, Na ya mafeza azagabanwa n'abatariho urubanza.

¹⁸ Yiyubakira inzu imeze nk'iy'inyenzi, Nk'akararo kubatswe n'umurinzi.

¹⁹ Yiryamira ari umukungu akabyuka ari nta cyo akigira, Arambuye amaso asanga byose byagiye.

²⁰ Ibiteye ubwoba bimwisukaho nk'isuri, N'umugaru umujyana ari nijoro.

²¹ Umuyaga w'iburasirazuba uramutwara akagendanirako, Uramuhitana akava aho yari ari.

²² Ndetse Imana iramusumira ntimubabarire, Nubwo yifuza guhunga amaboko yayo.

²³ Abantu bazamwirukana bamucyamuye, Bamwimyoze ngo ave iwe.