Yobu 26 - Bibiliya Yera

Yobu amusubiza yuko azakomeza kwizera Imana

¹ Maze Yobu arasubiza ati

² “Wafashije umunyantegenke ntugasekwe, Wakijije uw'amaboko adakomeye,

³ Wagiriye inama udafite ubwenge, Werekanye rwose ubwenge bw'ukuri!

⁴ Uwo wabwiye ayo magambo ni nde? N'umwuka wakuvuyemo ni uwa nde?

⁵ “Abapfuye bahindira umushyitsi Munsi y'amazi menshi n'ibiyabamo.

⁶ Ikuzimu hatwikururiwe imbere y'Imana, Na Kirimbuzi nta gitwikirizo afite.

⁷ Ikasikazi yahashanjije hejuru y'ubusa, N'isi yayitendetse ku busa.

⁸ Ipfunyika amazi mu bicu byayo bya rukokoma, Kandi ibicu ntibitoborwe na yo.

⁹ Intebe yayo irayikingira imbere, Ikayitwikiriza igicu cyayo.

¹⁰ Amazi menshi yayashyizeho urugabano, Rugeza aho umucyo n'umwijima biherera.

¹¹ Inkingi z'ijuru ziranyeganyega, Zigatangazwa no gucyaha kwayo.

¹² Ibirinduza inyanja ububasha bwayo, N'ubwenge bwayo ibutemesha imiraba y'ubwibone.

¹³ Umwuka wayo utera ijuru kurabagirana, N'ukuboko kwayo ikagusogotesha inzoka yihuta.

¹⁴ Dore ibyo ni ibyo ku mpera y'imigenzereze yayo gusa, Ibyo twumva byayo ni bike cyane ni nk'ibyongorerano, Ariko guhinda k'ububasha bwayo ni nde wagusobanura?”