Yobu 24 - Bibiliya Yera

¹ “Ubwo ibihe bidahishwa Ishoborabyose, Ni iki gituma abayizi batareba iminsi yayo?

² “Hariho abimura ingabano, Banyaga imikumbi ku rugomo, Bakayiragira.

³ Bahuguza impfubyi indogobe yayo, Batwara inka y'umupfakazi ho ingwate.

⁴ Birukana indushyi mu nzira, Abakene bo mu isi bagakoranira mu rwihisho.

⁵ “Dore bameze nk'imparage zo mu butayu, Bajya ku murimo wabo bakagira umwete wo guhaha, Ubutayu bubamereramo ibyokurya by'abana babo.

⁶ Batema ubwatsi mu mirima yaraye, Kandi bahumba imizabibu y'abanyabyaha.

⁷ Barara bambaye ubusa, Kandi mu mbeho nta cyo bifubika.

⁸ Banyagirwa n'imvura yo mu misozi, Kandi bikinga mu rutare babuze ubwugamo.

⁹ “Hariho abashikuza impfubyi ku ibere, Kandi bagafatīra icyo umukene atunze.

¹⁰ Bigatuma bagenda bambaye ubusa, Ari nta mwambaro bafite, Kandi bakorerwa imiba bashonje.

¹¹ Bagakamurira amavuta mu ngo z'abo bantu, Bakengera mu mivure yabo bafite inyota.

¹² No mu mudugudu utuwe cyane haba iminiho, Kandi ubugingo bw'inkomere burataka, Ariko Imana ntiyita kuri urwo rugomo.

¹³ “Abo ni abo mu banga umucyo, Ntibazi inzira zawo habe no kugendera muri zo.

¹⁴ Umwicanyi abyuka mu rukerera, Akica umukene n'indushyi, Kandi nijoro agenza nk'umujura.

¹⁵ Umusambanyi arindira ko bwira akavuga ati ‘Nta wuza kumbona’, akipfuka mu maso.

¹⁶ Mu mwijima bacukura amazu, Ku manywa bakikingirana, Ntabwo bazi umucyo.

¹⁷ Bose igitondo kibamerera nk'igicucu cy'urupfu, Kuko bamenyereye ubwoba butewe na cyo.

¹⁸ “Bahunga bacikiye mu mazi, Umurage wabo ukaba uw'ibivume mu isi, Ntabwo bahinguka mu nzira zijya mu mirima y'inzabibu.

¹⁹ Icyokere n'ubushyuhe bikamisha amazi ya shelegi, Ni ko ikuzimu hagenza abakoze ibyaha.

²⁰ Inda yamubyaye izamwibagirwa, Azaribwa n'inyo aziryohere, Ntazongera kwibukwa ukundi, Gukiranirwa kuzavunwa nk'igiti.

²¹ Anyaga ingumba itigeze kubyara, Kandi ntabwo agirira umupfakazi neza.

²² Ariko Imana ikomeza abakomeye n'imbaraga zayo, Ihagurutsa abihebye mu bugingo bwabo.

²³ Ibaha kugira amahoro bakagubwa neza, Kandi amaso yayo iyahanze ku nzira zabo.

²⁴ Bashyirwa hejuru, Hashira igihe gito, bakaba batakiriho. Ni ukuri bacishwa bugufi, Bakavanwa mu nzira nk'abandi bose, Bagatemwa nk'amasaka.

²⁵ Niba na n'ubu atari uko biri, Ni nde wahamya ko mbeshya, Agahindura ubusa ibyo mvuze?”