Yobu 23 - Bibiliya Yera

Yobu yifuza gushyikiriza Imana amagambo ye

¹ Maze Yobu arasubiza ati

² “Na n'ubu kuganya kwanjye kumeze nk'ubugome, Imikoba nkubitwa isumba umuniho wanjye.

³ Iyaba nari nzi aho nyibona, Ndetse ngo nshyikire intebe yayo,

⁴ Nayitangirira urubanza rwanjye rwose, Akanwa kanjye nkakuzuzamo amagambo yo kwiburanira,

⁵ Nkamenya amagambo yansubiza, Kandi nkumva icyo yambwira.

⁶ Mbese yankāngāza imbaraga zayo nyinshi? Oya ahubwo yanyitaho.

⁷ Aho ni ho umukiranutsi yaburanira na yo, Incira urubanza ikantsindishiriza iteka ryose.

⁸ “Dore nigira imbere ariko ntihari, Nasubiza inyuma nkayibura.

⁹ Mu kuboko kw'ibumoso aho ikorera na ho sinyiharuzi, Yihisha mu kuboko kw'iburyo kugira ngo ntayibona.

¹⁰ Ariko izi inzira nyuramo, Nimara kungerageza nzavamo meze nk'izahabu.

¹¹ Ikirenge cyanjye cyashikamye mu ntambwe zayo, Inzira yayo narayikomeje sinateshuka.

¹² Ntabwo nasubiye inyuma ngo mve mu mategeko yategetse, Ndetse amagambo yo mu kanwa kayo yambereye ubutunzi, Bundutira ibyokurya binkwiriye.

¹³ “Ariko igira icyo yitumye ni nde wabasha kuyivuguruza? Kandi icyo umutima wayo ukunze ni cyo ikora.

¹⁴ Kuko ari yo isohoza icyo nategekewe, Ndetse ifite n'ibimeze nk'ibyo byinshi.

¹⁵ Ni cyo gituma nkurwa umutima n'uko ndi imbere yayo, Iyo ntekereje ndayitinya.

¹⁶ Imana yihebesheje umutima wanjye, N'Ishoborabyose yanteye imidugararo.

¹⁷ Ni ibyo bimbabaza si umwijima, Cyangwa umwijima w'icuraburindi umpfutse mu maso.