Yobu 22 - Bibiliya Yera

Elifazi amuhamya ko icyaha ari cyo cyamuteye ibyago

¹ Maze Elifazi w'Umutemani arasubiza ati

² “Mbese umuntu yabasha kugira icyo amarira Imana? Ni ukuri umunyabwenge agira icyo yimarira ubwe.

³ Mbese Ishoborabyose inezezwa n'uko uri umukiranutsi? Cyangwa se gutunganya inzira zawe hari icyo biyunguye?

⁴ Icyo iguhanira ikagushyira mu rubanza ni uko uyubaha?

⁵ Ibibi byawe si byinshi? Ndetse ibicumuro byawe ntibigira urugero.

⁶ Kuko wajyanye ingwate z'abo muva inda imwe ku busa, Kandi uwambaye ubusa wamwimye umwambaro.

⁷ Ntiwahaye indushyi amazi yo kunywa, Kandi umushonji wamwimye ibyokurya.

⁸ Ariko ukomeye we yagiraga igihugu, Kandi uwubahwaga ni we wakibagamo.

⁹ Abapfakazi wabagenzaga ubusa, N'amaboko y'impfubyi akavunagurwa.

¹⁰ Ni cyo gituma imitego ikugose, N'ibiteye ubwoba bigutunguye biguhagaritse umutima.

¹¹ N'umwijima na wo urakugose ukubuza kubona, Kandi amazi menshi akurenzeho.

¹² “Mbese Imana ntiri hejuru mu ijuru? Kandi dore umutwe w'inyenyeri uko ziri kure.

¹³ Nawe ukavuga uti ‘Icyo Imana izi ni iki?’ Mbese yabasha guca urubanza inyuze mu mwijima w'icuraburindi?

¹⁴ Uti ‘Ibicu bya rukokoma biyibereye igitwikirizo, Biyibuza kureba, Kandi iratambagira ku gisenge cy'ijuru.’

¹⁵ “Mbese uzakomeza inzira ya kera, Iyo abanyabyaha banyuzemo?

¹⁶ Bakuweho igihe cyabo kitaragera, Urufatiro rwabo rutemba nk'umugezi.

¹⁷ Bakabwira Imana bati ‘Tuveho.’ Kandi bati ‘Icyo Ishoborabyose yatumarira ni iki?’

¹⁸ Nyamara amazu yabo yayujujemo ibintu byiza, Ariko imigambi y'inkozi z'ibibi imba kure.

¹⁹ Abakiranutsi barabireba bakishima Kandi abatariho urubanza barabaseka.

²⁰ Bati ‘Ni ukuri abari baduhagurukiye bararimbuwe, Kandi abasigaye babo batsembwe n'umuriro.’

²¹ “Noneho iyuzuze na yo ubone amahoro, Ubwo ni bwo ibyiza bizakuzaho.

²² Ndakwinginze wemere amategeko ava mu kanwa kayo, N'amagambo yayo uyashyire mu mutima wawe.

²³ Nugarukira Ishoborabyose, Ugashyira gukiranirwa kure y'urugo rwawe uzakomera.

²⁴ Ute ubutunzi bwawe mu mukungugu, N'izahabu ya Ofiri uyite mu mabuye yo mu masumo,

²⁵ Maze Ishoborabyose izakubera umutunzi, N'ifeza y'igiciro cyinshi.

²⁶ Ni bwo uzishimira Ishoborabyose, Ukerekeza amaso yawe ku Mana.

²⁷ Uzayisaba na yo izakumvira, Kandi uzahigura imihigo yawe.

²⁸ Uzagira icyo ugambirira kikubere uko ushaka, Kandi umucyo uzamurikira inzira zawe.

²⁹ Nibakugusha uzavuga uti ‘Hariho ikimbyutsa.’ Kandi uwicisha bugufi izamukiza,

³⁰ Ndetse izarokora n'uriho urubanza, Ni ukuri azakizwa no kubonera kw'amaboko yawe.”