Yobu 21 - Bibiliya Yera

Yobu aramusubiza

¹ Maze Yobu arasubiza ati

² “Nimuhugukire ibyo mvuga, Bimbere guhumuriza kwanyu.

³ Nimunyihanganire kugira ngo nanjye mvuge, Nimara kuvuga mukomeze museke.

⁴ Mbese umuntu ni we ntakira? Icyatuma ntareka kwihangana ni iki?

⁵ Nimunyitegereze mwumirwe, Maze mwifate ku munwa.

⁶ Iyo niyibutse ngira ubwoba, Kandi umushyitsi ugatigisa umubiri wanjye.

^7-8 “Ni iki gituma abanyabyaha babaho, Bakisāzira ndetse bakarushaho gukomera? Urubyaro rwabo rukomerana na bo barureba, N'ababakomokaho na bo bakabakomerera imbere.

⁹ Ingo zabo zibamo amahoro ntizigire icyo zīkanga, Kandi inkoni y'Imana ntibabanguriwe.

¹⁰ Amapfizi yabo arabyara ntabwo acogora, N'inka zabo zihora zibyara ntabwo ziramburura.

¹¹ Abana babo bato babagenda imbere nk'umukumbi, Kandi abana babo barabyina.

¹² Baririmbishwa n'ishako n'inanga, Bakishimira ijwi ry'umwironge.

¹³ Iminsi yabo bayimara baguwe neza, Hanyuma bakamanukira ikuzimu badatinze.

¹⁴ Bakabwira Imana kandi bati ‘Tuveho kuko tudashaka kumenya inzira zawe.’

¹⁵ Bati ‘Ishoborabyose ni iki kugira ngo tuyikorere? Kandi nituyisenga bizatumarira iki?’

¹⁶ Dore ihirwe ryabo ntiriri mu maboko yabo, Inama y'inkozi z'ibibi imbe kure.

¹⁷ “Ni kangahe itabaza ry'abanyabyaha rijya rizima, Ibyago byabo bikabageraho, Imana ikabagororera imibabaro, Ibitewe n'uburakari bwayo,

¹⁸ Kugira ngo bamere nk'ibishakashaka bigurukanwa n'umuyaga, Nk'umurama utumurwa n'ishuheri?

¹⁹ “Muravuga muti ‘Imana ibikira abana b'umunyabyaha igihano cy'ibyaha bye.’ Ahubwo umunyabyaha ubwe abe ari we ihana, Kugira ngo abimenye.

²⁰ Amaso ye abe ari yo areba kurimbuka kwe, Kandi anywe uburakari bw'Ishoborabyose.

²¹ Mbese ibizaba ku b'inzu ye bamukurikiye azabyitaho, Kandi apfuye akenyutse?

²² Hari uzigisha Imana ubwenge, Kandi ari yo icira urubanza abakomeye?

²³ “Umwe apfa agifite imbaraga zishyitse, Aguwe neza rwose kandi afite amahoro

²⁴ Ibicuba bye byuzuye amata, Kandi umusokoro wo mu magufwa ye urayagirana.

²⁵ Undi apfa afite intimba mu mutima, Atigeze kubona ibyiza.

²⁶ Bombi baryamana mu mukungugu, Inyo zikabatwikira.

²⁷ “Dore nzi ibyo mutekereza, N'imigambi mujya yo kungirira nabi.

²⁸ Kuko muvuga muti ‘Inzu y'igikomangoma iri he? N'urugo abanyabyaha babagamo ruri he?’

²⁹ “Mbese ntimurakabaza abagenzi? Ntimuzi icyo bahamije,

³⁰ Yuko umunyabyaha abikiwe umunsi w'amakuba, Kandi ko bajyanywe mu munsi w'uburakari?

³¹ Ni nde wamugaragariza inzira ye bahanganye? Ni nde wamwitura ibyo yakoze?

³² Nyamara azajyanwa mu mva, Kandi abantu bazarinda igituro cye.

³³ Ibisinde byo mu gikombe bizamuryohera, Kandi abantu bose bazamukurikira, Nk'abamubanjirije batabarika.

³⁴ “Noneho ni iki gituma mumporesha iby'ubusa? Ko numva ibyo munsubiza ari ibinyoma bisa!”