Yobu 20 - Bibiliya Yera

Zofari arongera avuga ubwa kabiri

¹ Maze Zofari w'Umunāmati arasubiza ati

² “Gutekereza kwanjye binteye gusubiza, Mbitewe n'ubwira mfite.

³ Numvise gucyahwa kunkojeje isoni, Kandi umutima wanjye ujijutse uranshubije.

⁴ “Mbese ntuzi ibyo bya kera, Uhereye igihe umuntu ashyizwe mu isi,

⁵ Yuko kwishima kw'inkozi z'ibibi kumara igihe gito, No kunezerwa k'utubaha Imana ari ukw'akanya gato gusa?

⁶ Nubwo ubwibone bwe bwagera ku ijuru, Umutwe we ukagera ku bicu,

⁷ Azashira buheriheri nk'umwanda umuvamo. Abamubonaga bazavuga bati ‘Ari he?’

⁸ Azaguruka abure nk'inzozi kandi ntazongera kuboneka, Ni ukuri azirukanwa nko kurota kwa nijoro.

⁹ Ijisho ryamurebaga ntirizongera kumubona ukundi, N'ahantu he ntihazongera kumureba.

¹⁰ Abana be bazihakirizwa ku bakene, Kandi amaboko ye azariha ubutunzi yahuguje.

¹¹ Amagufwa ye yuzuye imbaraga z'ubusore, Ariko buzaryamana na we mu mukungugu.

¹² “Nubwo ibyaha bimuryohera mu kanwa, Akabihisha munsi y'ururimi rwe,

¹³ Akabikuyakuya ntabireke, Ahubwo akabikomeza mu kanwa ke,

¹⁴ Ibyokurya bye bizamuhindukira mu nda, Bimuberemo ubusagwe bw'incira.

¹⁵ Ubutunzi yabumize bunguri kandi azaburuka, Imana izabuhubuza mu nda ye.

¹⁶ Azanyunyuza ubusagwe bw'incira, Azicwa n'ururimi rw'impiri.

¹⁷ Ntazareba imigezi, Cyangwa utugezi dutembamo ubuki n'amavuta.

¹⁸ Ibyo yakoreye azabigarura ntazabimira, Ntazanezerwa nk'uko ubutunzi yahuguje bungana.

¹⁹ Kuko yarenganije abakene akabirengagiza, Yashenye amazu atubatse.

²⁰ Mu byo yishimiraga byose nta na kimwe azakiza, Kuko muri we nta mahoro.

²¹ Nta kintu cyasigaye atariye, Ni cyo gituma atazahorana kugubwa neza.

²² Igihe azaba afite ibimuhagije bisāze azabikenana, Ukuboko k'ukennye wese kuzamugeraho.

²³ Igihe azaba agiye guhaza inda ye, Imana izamusukaho uburakari bwayo bukaze, Ibumuvunderezeho ariho arya.

²⁴ Azahunga intwaro y'icyuma, Kandi umwambi w'umuheto w'umuringa uzamuhinguranya,

²⁵ Awishingure usohoke mu mubiri we. Ni ukuri n'icyuma kirabagirana kizasohoka gihinguranije umwijima we, Ibiteye ubwoba bimugezeho.

²⁶ Ubutunzi bwe bubikiwe umwijima wose, Umuriro utakijwe n'umuntu uzamukongora, Uzatwika ibisigaye mu rugo rwe byose.

²⁷ Ijuru rizagaragaza ibyaha bye, Kandi isi izamuhagurukira.

²⁸ Inyungu yo mu nzu ye izanyagwa, N'ibintu bye bizatagarana ku munsi w'uburakari bwayo.

²⁹ “Uwo ni wo mugabane w'inkozi y'ibibi uva ku Mana, N'umwandu yagenewe na yo.”