Yobu 19 - Bibiliya Yera

Yobu abasubizanya kwizera gukomeye

¹ Maze Yobu arasubiza ati

² “Muzahereza he mubabaza umutima wanjye, Mukamvunaguza amagambo yanyu?

³ Ubu ni ubwa cumi munshinyagurira, Ntabwo mukorwa n'isoni zo kungirira nabi.

⁴ Niba naracumuye koko, Igicumuro cyanjye ni jye kiriho.

⁵ Niba mushaka kunyibonaho, No kumpamya ibyo munsebya,

⁶ Mumenye yuko ari Imana yubitse urubanza rwanjye, Ikangotesha imitego yayo.

⁷ Dore ndatakishwa no kugirirwa urugomo ariko sinumvirwa, Ndatabaza nta rubanza rutabera ruhari.

⁸ Inzira yanjye yarayishe bituma ntabasha guhita, Kandi inzira zanjye yazikwijemo umwijima.

⁹ Yanyaze icyubahiro cyanjye, Inyaka ikamba ryo ku mutwe wanjye.

¹⁰ Yanyishe inturutse impande zose none ndapfuye, Kandi ibyiringiro byanjye yabiranduye nk'igiti.

¹¹ Yankongejeho uburakari bwayo, Kandi imbarira mu banzi bayo.

¹² Ingabo zayo zaziye icyarimwe, Zishaka inzira yo kuntera, Maze zigota urugo rwanjye.

¹³ “Yantandukanije n'abo tuva inda imwe, Kandi abo twari tuziranye baranyigurukije.

¹⁴ Bene wacu bantaye, N'incuti zanjye zanyibagiwe.

¹⁵ Abo mu nzu yanjye n'abaja banjye bangenje nk'umushyitsi, Mbamereye nk'umunyamahanga.

¹⁶ Mpamagara umugaragu wanjye ntarushye anyitaba, Nubwo mwingingisha akanwa kanjye.

¹⁷ Umugore wanjye azinutswe umwuka wanjye, Kandi gusaba kwanjye kuzinutswe bene mama.

¹⁸ Ndetse n'abana bato baransuzugura, Iyo mbyutse bamvuga nabi.

¹⁹ Incuti zanjye z'amagara zose ziranzinutswe, N'abo nakundaga bampindukiye abanzi.

²⁰ Amagufwa yanjye yumiranye n'umubiri wanjye n'inyama zanjye, Ndetse nsigaye ku menyo gusa.

²¹ “Mungirire imbabazi, Mungirire imbabazi mwa ncuti zanjye mwe, Kuko ukuboko kw'Imana kunkozeho.

²² Murandenganyiriza iki mukangirira uko Imana ingize? Uko meze ntikubahagije?

Yobu ahamya ko afite Umucunguzi uzamukiza

²³ “Iyaba amagambo yanjye yari yanditswe! Iyaba yari yanditswe mu gitabo!

²⁴ Akandikishwa ikaramu y'icyuma n'icyuma cy'isasu, Agakebwa ku rutare ngo ahoreho iteka.

²⁵ Ariko jye ubwanjye nzi yuko Umucunguzi wanjye ariho, Kandi ko amaherezo azahagarara mu isi.

²⁶ Kandi uruhu rwanjye nirumara kubora, Nzareba Imana mfite umubiri.

²⁷ Nzayireba ubwanjye, Amaso yanjye azayitegereza si ay'undi. Nuko umutima wanjye umarwa n'urukumbuzi.

²⁸ Ahubwo mwari mukwiriye kuvuga muti ‘Twamurenganya dute, Ko afite impamvu zimuha urubanza?’

²⁹ “Nimutinye inkota, Kuko uburakari buteza guhanwa n'inkota, Kugira ngo mumenye yuko hariho urubanza rutabera.”