Yobu 18 - Bibiliya Yera

Biludadi arongera aravuga ubwa kabiri

¹ Maze Biludadi w'Umushuhi arasubiza ati

² “Impaka zanyu zizahereza he? Nimutekereze maze tubone kuvuga.

³ Ni kuki dutekerezwa nk'inyamaswa, Mukatureba nk'abanduye?

⁴ Weho witanyagura ubitewe n'uburakari bwawe, Mbese isi yarekwa ku bwawe, Cyangwa urutare rwavanwaho ku bwawe?

⁵ “Ni ukuri urumuri rw'umunyabyaha ruzazima, Kandi ikibatsi cy'umuriro we ntikizaka.

⁶ Umucyo uzahindukira umwijima mu nzu ye, N'itabaza rye rimuri hejuru rizazima.

⁷ Intambwe ze z'imbaraga zizateba, Imigambi ye bwite ni yo izamugusha.

⁸ Erega ibirenge bye ni byo bimugusha mu kigoyi, Agakandagira mu mitego!

⁹ Umutego w'umushibuka uzamufata agatsinsino, Igisambi kizamufata kimutsinde.

¹⁰ Ubukira bwo kumufata buhishwe mu butaka, N'ubushya buri mu nzira ye.

¹¹ “Ibiteye ubwoba bizamuturuka impande zose, Bimurye isataburenge.

¹² Imbaraga ze zimarwa n'inzara, Kandi ibyago bizaba byubikiriye iruhande rwe.

¹³ Ingingo z'umubiri we zizamirwa bunguri, Ni ukuri impfura y'urupfu izarya ingingo ze.

¹⁴ Azarandurwa mu rugo rwe yiringiraga, Kandi azashyirwa umwami w'ibiteye ubwoba.

¹⁵ Abatari abe bazaba mu rugo rwe, Amazuku azasukwa ku buturo bwe.

¹⁶ Imizi ye izumira hasi, N'ishami rye rizacirwa hejuru.

¹⁷ Kwibukwa kwe kuzashira mu isi, Kandi izina rye ntirizongera kuvugwa mu nzira.

¹⁸ Azirukanwa ave mu mucyo ajye mu mwijima, Ndetse azacibwa mu isi.

¹⁹ Ntazagira umuhungu cyangwa umwuzukuru mu bwoko bwe, Cyangwa uzasigara aho yari atuye.

²⁰ Abazaza nyuma ye bazatangarira umunsi we, Nk'uko abamubanjirije bafashwe n'ubwoba.

²¹ Ni ukuri aho ni bwo buturo bw'ukiranirwa, Kandi aho ni ho hantu h'utazi Imana.”