Yobu 17 - Bibiliya Yera

¹ “Umwuka wanjye uraheze, iminsi yanjye irashize, Igituro kirantegereje.

² Ni ukuri nkikijwe n'abakobanyi, Nta kindi mpora ndeba keretse abanshungera.

³ Noneho tanga ingwate unyishingire kuri wowe, Uwo twakorana mu biganza dusezerana ni nde?

⁴ Kuko imitima yabo wayihishe ubwenge, Ni cyo gituma utazabashyira ejuru.

⁵ Umuntu utanga incuti ze ngo zibe iminyago, Amaso y'abana be aziheba.

⁶ Ariko yangize iciro ry'imigani mu bantu, Kandi bancira mu maso.

⁷ Agahinda gateye ijisho ryanjye guhunyeza, N'ingingo zanjye zose zimeze nk'igicucu.

⁸ Ibyo bizatera inyangamugayo kūmirwa. Kandi utariho urubanza aziyenza ku batubaha Imana.

⁹ Ariko umukiranutsi azikomeza mu nzira ye, N'ufite amaboko aboneye azakomeza kunguka imbaraga.

¹⁰ Ariko mwebweho mwese nimugaruke muze, Nta munyabwenge n'umwe nabona muri mwe.

¹¹ “Iminsi yanjye irashize, Imigambi umutima wanjye wibwiraga ipfuye ubusa.

¹² Ijoro barihinduye amanywa, N'umucyo usatiriye umwijima.

¹³ Iyo ntegereje ikuzimu ko ari ho iwanjye, Iyo nshashe uburiri bwanjye mu mwijima.

¹⁴ Iyo mbwiye Kubora nti ‘Uri data’, Nkabwira n'inyo nti ‘Uri mama kandi uri na mushiki wanjye’.

¹⁵ Noneho ibyiringiro byanjye biri he, Kandi ibyo byiringiro byanjye ni nde uzabibona?

¹⁶ Bizamanuka bigere ku myugariro y'ikuzimu, Ubwo nzaruhukanira na byo mu mukungugu.”