Yobu 16 - Bibiliya Yera

Yobu aramusubiza

¹ Maze Yobu arasubiza ati

² “Numvise byinshi nk'ibyo Mwese ko muri abahumuriza baruhanya.

³ Mbese amagambo y'ubusa ntabwo azashira? Ikigutera kunsubiza ni iki?

⁴ Nanjye nashobora kuvuga nkamwe, Iyaba ari mwe mwari mumeze nkanjye, Nabashije gukoranya amagambo yo kubanegura, Nkabazunguriza umutwe.

⁵ Ahubwo nabakomeresha akanwa kanjye, No guhumuriza k'ururimi rwanjye kwaborohereza.

⁶ Nubwo mvuga umubabaro wanjye ntugabanuka, Naho nakwiyumanganya nakoroherwa nte?

⁷ Ariko none irandembeje, Yarimbuye abanjye bose.

⁸ Nanjye yankozeho ni byo bimpamya, Kunanuka kwanjye byarampagurukiye bimbera umushinja.

⁹ Yantanyaguje uburakari bwayo indenganya, Yampekenyeye amenyo, Umwanzi wanjye ankanuriye amaso.

¹⁰ Baranyasamiye, Bankubise ku itama barantuka Bateraniye hamwe ngo bantere.

¹¹ Imana yangabije abatayubaha, Injugunya mu maboko y'inkozi z'ibibi.

¹² Nari nguwe neza maze iramvunagura, Ni ukuri yamfashe mu ijosi iramenagura, Kandi ingira intego yayo.

¹³ Abarashi bayo barangose, Impinguranije impyiko ntiyababarira, Isesa indurwe yanjye hasi.

¹⁴ Inciye ibyuho yungikanya, Insumiye nk'igihanyaswa.

¹⁵ “Umubiri wanjye nawudodeyeho ibigunira, Kandi ihembe ryanjye naritabye mu mukungugu.

¹⁶ Mu maso hanjye hakobowe no kurira, Amaso yanjye ararerembura nk'uwenda gupfa,

¹⁷ Nubwo ari nta rugomo ruri mu maboko yanjye, Kandi gusenga kwanjye kukaba gutunganye.

¹⁸ “Wa si we, we gutwikira amaraso yanjye, Kandi gutaka kwanjye kwe kugira aho guturiza.

¹⁹ N'ubu dore Imbera umuhamya iri mu ijuru, Indengera iri hejuru.

²⁰ Incuti zanjye zirankoba, Ariko ijisho ryanjye rirasuka amarira imbere y'Imana,

²¹ Kugira ngo ihagarikire umuntu uyiburanya, N'umwana w'umuntu uburana na mugenzi we.

²² Kuko imyaka mike nishira, Nzanyura mu nzira ntazagarukamo ukundi.