Yobu 15 - Bibiliya Yera

Elifazi arongera avuga ubwa kabiri

¹ Maze Elifazi w'Umutemani arasubiza ati

² “Mbese umunyabwenge yasubizanya ubwenge bw'ubusa, Akiyuzuzamo umuyaga uturuka iburasirazuba?

³ Mbese yagisha impaka n'amagambo adafite impamvu? Cyangwa yakwita ku bigambo kandi nta mumaro?

⁴ Ni ukuri kubaha Imana ubikuyeho, Kandi ubuzanije no kuyisenga.

⁵ Kuko ibicumuro byawe ari byo byigisha akanwa kawe, Nawe wihitiyemo ururimi rw'ubucakura.

⁶ Akanwa kawe ni ko kakurega si jye, Ni ukuri iminwa yawe ni yo iguhamya.

⁷ Mbese ni wowe wabanjirije abandi kuvuka? Cyangwa se wabyawe imisozi itararemwa?

⁸ Wigeze kumva inama zihishwe z'Imana? Mbese wihariye ubwenge?

⁹ Ibyo uzi tutazi ni ibiki? Icyo umenya tudafite ni iki?

¹⁰ Turimo abameze imvi n'abasaza rukukuri, Baruta so ubukuru.

¹¹ Mbese ibihumuriza by'Imana bikubereye bike, ntibiguhaza? N'amagambo y'ubugwaneza wabwiwe na yo ntiyakunyuze?

¹² Ni iki gituma umutima wawe uguhabya, Amaso yawe agahumbaguza,

¹³ Ukerekeza umutima ho kwinubira Imana, Ukubahuka kuvuga amagambo ameze atyo?

¹⁴ “Umuntu ni iki kugira ngo yere, N'ubyawe n'umugore ngo abe umukiranutsi?

¹⁵ Dore abera bayo ntabwo ibiringira, Ndetse n'ijuru ntabwo ritunganye imbere yayo,

¹⁶ Nkanswe umuntu w'igicamuke wangiritse, Ugotomera ibyaha nk'amazi.

¹⁷ “Ngiye kukuburira unyumvire, Kandi ibyo nabonye ndabikumenyesha,

¹⁸ (Ibyo abanyabwenge bavuze, Babikuye kuri ba se ntibabihishe,

¹⁹ Abahawe igihugu bonyine, Ntibanyurwemo n'umunyamahanga.)

²⁰ “Umunyabyaha ahorana umubabaro iminsi ye yose, Akagira imyaka mike igenewe abanyarugomo.

²¹ Ijwi ry'ibiteye ubwoba riba mu matwi ye, Naho yaba akiri mu mahoro, Umurimbuzi azamutera.

²² Ntiyizera yuko azava mu mwijima, Kandi azi ko inkota ihora imwubikiye.

²³ Asuhuka ajya guhaha ati ‘Amahaho ari he?’ Azi ko ategekewe umunsi w'umwijima.

²⁴ Amakuba n'umubabaro bimutera ubwoba, Biramutsinda nk'umwami witeguriye kurwana.

²⁵ “Kuko yabanguriye Imana ukuboko kwe, Akagenza nk'umwibone yibasiye Ishoborabyose,

²⁶ Akayirohaho ashinze ijosi, Yitwaje ingabo zifite amacondo akomeye,

²⁷ Kuko afite umubyibuho mu maso he, Akaba afite ibicece mu rukenyerero rwe,

²⁸ Kandi atuye mu midugudu yabaye imisaka, No mu mazu y'imirangara atagira abantu, Agiye guhinduka ibirundo.

²⁹ Ntazaba umukire n'ubutunzi bwe ntibuzagumaho, N'umwero wabo ntuzagandara ku isi.

³⁰ Ntabwo azava mu mwijima, Ikirimi cy'umuriro kizababura amashami ye, Kandi azajyanwa n'umwuka wo mu kanwa k'Imana.

³¹ Ye kwiringira iby'ubusa yishuka, Kuko ibitagira umumaro ari byo azagororerwa.

³² Bizasohora igihe cye kitaragera, Kandi ishami rye ntirizatoha.

³³ Azamera nk'umuzabibu waragaritse imbuto zawo zikiri mbisi, Nk'umwelayo wahungutseho uburabyo bwawo.

³⁴ “Kuko iteraniro ry'abatubaha Imana rizasigaramo ubusa, Kandi umuriro uzatwika amahema y'abahongerwa.

³⁵ Basama igomwa bakabyara ubukiranirwe, Kandi umutima wabo ushibukamo uburiganya.”