Yobu 14 - Bibiliya Yera

¹ “Umuntu wabyawe n'umugore, Arama igihe gito kandi cyuzuyemo umuruho agakenyuka.

² Avuka ameze nk'ururabyo, maze agacibwa, Ahita nk'igicucu kandi ntarame.

³ Mbese nawe umuntu umeze atyo warushya umureba, Cyangwa nkanjye wanshyira mu rubanza?

⁴ Ni nde wabasha kuvana igitunganye mu kintu cyanduye? Nta we.

⁵ Ubwo iminsi ye yategetswe, umubare w'amezi ye ugategekwa nawe, Kandi ukamushyiriraho urugabano atabasha kurenga,

⁶ Umukureho amaso abone akaruhuko, Kugeza ubwo azarangiza iminsi ye nk'ukorera ibihembo.

⁷ “Erega hariho ibyiringiro yuko igiti iyo gitemwe cyongera gushibuka, Kandi kikajya kigira amashami y'ibitontome.

⁸ Nubwo umuzi wacyo usazira mu butaka, N'igishyitsi cyacyo kigahera mu mukungugu,

⁹ Iyo cyumvise amazi cyongera gushibuka, Kigatoha nk'igiti kikiri gito.

¹⁰ Ariko umuntu we arapfa akagendanirako, Ni ukuri umwuka w'umuntu urahera. Ubwo akaba ari he?

¹¹ “Uko amazi yo mu nyanja yuzuruka, N'umugezi uko ugabanuka ugakama;

¹² Ni ko umuntu aryama ubutabyuka, Kugeza ubwo ijuru rizaba ritakiriho, ntabwo bazakanguka cyangwa kubyutswa ngo bave mu bitotsi byabo.

¹³ “Icyampa ukampisha ikuzimu, Ukandindira mu rwihisho kugeza ubwo uburakari bwawe buzashira, Ukantegekera igihe kandi ukazanyibuka.

¹⁴ Umuntu napfa azongera abeho? Naba nihanganiye iminsi y'intambara yanjye yose, Ntegereje igihe cyanjye cyo kurekurwa.

¹⁵ Wampamagara nakwitaba, Washatse kubona umurimo w'amaboko yawe.

¹⁶ Ariko ubu urabara intambwe zanjye, Mbese ntiwitegereza icyaha cyanjye?

¹⁷ Igicumuro cyanjye gikingiraniwe mu ruhago, N'ibyaha byanjye ubihambiriye hamwe.

¹⁸ Ariko umusozi utenguka uhinduka ubusa, Kandi urutare ruvanwa aho rwari ruri.

¹⁹ Amazi agimbya amabuye, Isuri itembana umukungugu wo ku isi, Uko ni ko ukuraho ibyo umuntu yizeye.

²⁰ Umutsinda buheriheri akagendenirako, Uhindura mu maso he ukundi ukamwohēra.

²¹ Abahungu be bagira ikuzo ntabimenye, Bacishwa bugufi ntamenye agakuru kabo.

²² Ahubwo umubiri we ugira uburibwe, Kandi umutima wo muri we uramugongesha.”