Yobu 13 - Bibiliya Yera

¹ “Dore ijisho ryanjye ryabonye ibyo byose Ugutwi kwanjye kwarabyumvise ndabimenya.

² Ibyo muzi nanjye ndabizi, Ntimundusha.

³ Ni ukuri ndashaka kuvugana n'Ishoborabyose, Kandi ndifuza kwiburanira ku Mana.

⁴ Ariko muri abahimbyi b'ibinyoma, Mwese muri abavūzi badafite akamaro.

⁵ Icyampa mugahora rwose, Mwaba mugize ubwenge.

⁶ “Noneho nimwumve urubanza rwanjye, Kandi mutegere amatwi kuburana kw'iminwa yanjye.

⁷ Mbese murashaka kuburanira Imana? Muvuga ibyo gukiranirwa mukariganya?

⁸ Murayicira urwa kibera? Murashaka kuvugira Imana?

⁹ Mbese ibagenzuye aho byababera byiza? Murashaka kuyiriganya nk'uko umuntu ariganya undi?

¹⁰ Ni ukuri izabahana, Niba muca urwa kibera rwihishwa.

¹¹ Mbese gukomera kwayo ntikuzabatera ubwoba, Igitinyiro cyayo kikabagwira?

¹² Amagambo yanyu akomeye ni imigani imeze nk'ivu, Ibihome byanyu ni ibihome by'icyondo.

¹³ Nimuceceke mundeke mvuge, Bingirire uko bishaka.

¹⁴ Ni iki gituma nirya nkimara, Ngahara amagara yanjye?

¹⁵ Naho yanyica napfa nyiringira, Nubwo bimeze bityo, inzira zanjye nzazikomeza imbere yayo.

¹⁶ Ibyo na byo bizambera agakiza, Kuko ari nta muntu uhakana Imana uzaza imbere yayo.

¹⁷ Nimuhugukire amagambo yanjye, N'ibyo mpamya bigere mu matwi yanyu.

¹⁸ Dore maze gutunganya urubanza rwanjye, Nzi yuko ndi umukiranutsi.

¹⁹ “Uwo tuzaburana ni nde? Kuko naceceka umwuka wahera.

²⁰ Ariko we kungirira ibi uko ari bibiri, Ni bwo ntazihisha mu maso hawe.

²¹ Gerura ukuboko kwawe kundeke, Kandi ntuntereshe igitinyiro cyawe ubwoba.

²² “Maze umpamagare ndakwitaba, Cyangwa ureke mvuge nawe unsubize.

²³ Ibicumuro byanjye n'ibyaha byanjye ni bingahe? Umenyeshe igicumuro cyanjye n'icyaha cyanjye.

²⁴ “Ni iki gituma unyima amaso ukangira umwanzi wawe?

²⁵ Mbese warushya ikibabi gitumurwa n'umuyaga, Ugakurikirana umurama wumye?

²⁶ “Kuko unyandikaho ibintu binsharirira, Kandi ugatuma ndimūra ibyaha byo mu busore bwanjye.

²⁷ Ibirenge byanjye na byo ubishyize mu ngoyi, Kandi witegereze imigendere yanjye yose, Ibirenge byanjye ubishyizeho urukubo,

²⁸ Nubwo meze nk'ikintu kiboze cyononekaye, Cyangwa nk'umwambaro wariwe n'inyenzi.