Yobu 12 - Bibiliya Yera

Yobu ahinyura amagambo y'incuti ze

¹ Maze Yobu arasubiza ati

² “Boshye ari mwe bantu gusa, Kandi ubwenge buzapfana namwe.

³ Ariko nanjye nzi ubwenge ntimubundusha, Ese ibyo hari utabizi?

⁴ Meze nk'ushungerwa n'umuturanyi we, Ari jye watabazaga Imana ikantabara, None umukiranutsi utunganye bamugize ibitwenge.

⁵ Umutima w'uguwe neza urimo gusuzugura umuntu ubonye amakuba, Abanyerera bagenewe gusekwa.

⁶ Ingo z'abambuzi zirahirwa, N'abarakaza Imana babona amahoro, Amaboko yabo ni yo bagize imana yabo.

⁷ “Nuko ubaze inyamaswa na zo zizakwigisha, N'inyoni zo mu kirere na zo zizagusobanurira,

⁸ Cyangwa uvugane n'isi na yo izakwigisha, Kandi amafi yo mu nyanja azakubwira.

⁹ Muri ibyo byose ni ikihe kitazi Ko ukuboko k'Uwiteka ari ko kwakoze ibyo byose?

¹⁰ Ni we ufite mu kuboko kwe ubugingo bw'ikizima cyose, N'umwuka w'umuntu wese.

¹¹ Mbese ugutwi si ko kurobanura amagambo, Nk'uko akanwa kumva ibyokurya?

¹² “Ubwenge bufitwe n'abasaza, Kandi kumenya gufitwe n'abaramye iminsi myinshi.

¹³ Ubwenge n'imbaraga bifitwe n'Imana, Igira inama no kumenya.

¹⁴ Dore irasenya maze ntihasubire kubakika, Ikingirana umuntu ntihakingurike.

¹⁵ Yimana amazi agakama, Maze yayatanga akubika isi.

¹⁶ “Imbaraga n'ubuhanga bifitwe na yo, Umuriganya n'uriganywa ni abayo.

¹⁷ Ijyana abajyanama ho iminyago, N'abacamanza ikabajijisha.

¹⁸ Ni yo yica amasezerano y'abami, Kandi ikababohesha imigozi.

¹⁹ Ijyana abatambyi ho iminyago, Kandi yubika intwari.

²⁰ Imwaza amagambo y'abiringirwa, Kandi abasaza ikabaka ubwenge.

²¹ Ibikomangoma ibisukaho gusuzugurwa, Kandi idohora umushumi w'intwari.

²² Igaragaza ibitamenyekana byo mu mwijima, Kandi igicucu cy'urupfu igishyira mu mucyo.

²³ Igwiza amahanga kandi ikayarimbura, Ni yo igaba ingabo zayo kandi ni yo izigarura.

²⁴ Abatware b'amahanga yo mu isi ibakura umutima, Ikabazerereza mu butayu aho inzira zitari.

²⁵ Barindagirira mu mwijima ari nta mucyo bafite, Kandi ibadandabiranya nk'umusinzi.