Yobu 11 - Bibiliya Yera

Zofari na we ahamya Yobu uburyarya

¹ Maze Zofari w'Umunāmati arasubiza ati

² “Mbese amagambo y'amakabya ntakwiriye gusubizwa? Umuntu yatsindishirizwa n'uko ari imvuganyi?

³ Cyangwa abantu bakwiriye gucecekeshwa no kwirata kwawe? Igihe usuzugura nta wagukoza isoni?

⁴ Kuko uvuga uti ‘Ibyo nigisha biratunganye, Ndi intungane mu maso yawe.’

⁵ Ariko icyampa Imana ikavuga, Ikakubumburiraho iminwa yayo,

⁶ Ikakwereka ibihishwe by'ubwenge, Bukoresha uburyo bwinshi. Noneho umenye yuko Imana itaguhannye, Nk'uko ibyaha byawe bikwiriye.

⁷ “Mbese wabasha kugenzura Imana ukayimenya? Wabasha kumenya Ishoborabyose ukarangiza?

⁸ Biri hejuru nk'ijuru, wabigira ute? Biri hasi kuruta ikuzimu, wabimenya ute?

⁹ Urugero rwabyo rusumba isi, N'ubugari bwabyo buruta inyanja.

¹⁰ Iyo ihise igakinga, igatumira abantu kujya mu rubanza, Ni nde wabasha kuyibuza?

¹¹ Kuko itayobewe abantu b'ubusa, Ibona n'ibigoryi, Mbese yabyirengagiza?

¹² Ariko umuntu w'ubusa abura ubwenge, Ni ukuri umuntu avuka nk'inyana y'imparage.

¹³ “Nuboneza umutima wawe ukayitegera amaboko,

¹⁴ Niba hari ikibi mu kuboko kwawe ugite kure, Kandi we kwemera ko gukiranirwa kuba mu rugo rwawe.

¹⁵ Ni ukuri ni ho uzubura amaso yawe udafite ikizinga, Uzakomera kandi ntabwo uzatinya,

¹⁶ Kuko uzibagirwa umubabaro wawe, Uzawibuka nk'amazi amaze gutemba.

¹⁷ Kandi ubugingo bwawe buzarabagirana kurusha amanywa y'ihangu, Naho haba umwijima hazatambika umuseke.

¹⁸ Kandi uzaba amahoro kuko hariho ibyiringiro, Ni ukuri uzakebuka ibigukikije, wiruhukire mu mahoro.

¹⁹ Uzaryama he kugira ugutera ubwoba, Ni ukuri benshi bazaguhakwaho.

²⁰ Ariko amaso y'abanyabyaha aziheba, Kandi ntibazabona aho guhungira, N'ibyiringiro byabo bizaba guheza umwuka.”