Yesaya 38 - Bibiliya Yera

Hezekiya yongererwa imyaka yo kubaho

¹ Muri iyo minsi Hezekiya ararwara yenda gupfa. Bukeye umuhanuzi Yesaya mwene Amosi aramusanga aramubwira ati “Uwiteka aravuze ngo ‘Tegeka iby'inzu yawe kuko utazakira, ahubwo ugiye gutanga.’ ”

² Nuko Hezekiya yerekera ivure atakambira Uwiteka ati

³ “Ndakwinginze Uwiteka, uyu munsi wibuke ko najyaga ngendera mu by'ukuri imbere yawe n'umutima utunganye, ngakora ibishimwa imbere yawe.” Nuko Hezekiya ararira cyane.

⁴ Maze ijambo ry'Uwiteka rigera kuri Yesaya riti

⁵ “Subirayo ubwire Hezekiya uti ‘Uwiteka Imana ya sogokuruza Dawidi iravuze iti: Numvise gusenga kwawe mbona n'amarira yawe, kubaho kwawe nzongeraho indi myaka cumi n'itanu.

⁶ Kandi nzagukizanya n'uyu murwa mbakize umwami wa Ashuri, nzawurinda.

⁷ “ ‘Iki ni cyo kimenyetso Uwiteka aguhaye, gihamya yuko Uwiteka azasohoza icyo avuze.

⁸ Dore nzahera aho igicucu kigeze ku ntambwe z'urugero rwa Ahazi, ngisubizanyeyo n'izuba intambwe cumi.’ ” Nuko izuba rihera aho ryari rigeze rirenga, risubirayo umwanya w'intambwe cumi z'urugero.

⁹ Ibyo Hezekiya umwami w'Abayuda yanditse ubwo yarwaraga agakira ni ibi:

¹⁰ Naravuze nti “Ndakenyutse ngiye kunyura mu marembo y'ikuzimu, nteshejwe imyaka yanjye yari isigaye.”

¹¹ Ndavuga nti “Sinzongera kureba Uwiteka mu gihugu cy'abazima, kandi sinzongera kubonana n'abantu b'abaturage bo mu isi.

¹² Ubugingo bwanjye buratamurutse bunkuweho nk'ihema ry'umwungeri, ubugingo bwanjye ndabuzinze nk'uko umuboshyi w'imyenda ayizinga, azanca mu biti biboherwamo imyenda. Uhereye mu gitondo ukageza nijoro, uzaba umazeho rwose.

¹³ Ndaceceka nkageza mu gitondo, ariko uvuna amagufwa yanjye yose nk'intare. Uhereye mu gitondo ukageza nijoro, uzaba umazeho rwose.

¹⁴ Ntaka nk'intashya cyangwa uruyongoyongo, nkaniha nk'inuma iguguza. Erega amaso yanjye yaheze hejuru! Nyagasani Uwiteka ndarengana, ndengera.”

¹⁵ Mvuge iki kandi? Ubwo yanshubije ubwe wenyine ni we wabikoze, imyaka yanjye nzamara yose nzajya ngende niyoroheje, nibuke umubabaro wo mu mutima wanjye.

¹⁶ Uwiteka, ibyo ni byo bibeshaho abantu, kandi muri ibyo byonyine ni ho umutima wanjye ubona ubugingo. Nuko nkiza umbesheho.

¹⁷ Erega icyatumye ngira ibinsharirira cyane ni ukugira ngo mbone amahoro! Kandi urukundo wakunze ubugingo bwanjye rwatumye ubukiza urwobo rw'iborero, ibyaha byanjye byose warabyirengeje.

¹⁸ Kuko ikuzimu hatabasha kukogeza n'urupfu rutabasha kuguhimbaza, abamanuka bajya muri rwa rwobo ntibabasha kwiringira ukuri kwawe.

¹⁹ Umuzima, umuzima ni we uzakogeza nk'uko nkogeza uyu munsi, se w'abana azabigisha ukuri kwawe.

²⁰ Uwiteka yiteguye kunkiza, ni cyo kizatuma turirimba mu nanga indirimbo nahimbye turi mu nzu y'Uwiteka, iminsi yose tuzamara tukiriho.

²¹ Kandi Yesaya yari yababwiye ngo “Bende umubumbe w'imbuto z'umutini bawushyire ku kirashi cye, azakira.”

²² Kandi Hezekiya yari yabajije ati “Ni kimenyetso ki cyerekana ko nzazamuka nkajya mu nzu y'Uwiteka?”