Matayo 28 - Bibiliya Yera

Kuzuka kwa Yesu

¹ Nuko umunsi w'isabato ushize, ku wa mbere w'iminsi irindwi, umuseke wenda gutambika, Mariya Magadalena na Mariya wundi bajya kureba cya gituro.

² Habaho igishyitsi cyinshi, kuko marayika w'Umwami Imana yari amanutse avuye mu ijuru, abirindura igitare acyicaraho.

³ Ishusho ye yasaga n'umurabyo, n'imyenda ye yeraga nk'urubura.

⁴ Ba barinzi bamubonye bagira ubwoba bahinda imishitsi, basa n'abapfuye.

⁵ Ariko marayika abwira abagore ati “Mwebweho mwitinya, kuko nzi yuko mushaka Yesu wabambwe.

⁶ Ntari hano kuko yazutse nk'uko yavuze, nimuze murebe aho Umwami yari aryamye.

⁷ Nimugende vuba mubwire abigishwa be yuko yazutse, kandi azababanziriza kujya i Galilaya. Iyo ni ho muzamubonera dore ndabibabwiye.”

⁸ Bava mu gituro vuba bafite ubwoba n'ibinezaneza byinshi, birukanka bajya kubibwira abigishwa be.

⁹ Maze Yesu ahura na bo arababwira ati “Ni amahoro!” Baramwegera bamufata ku birenge, baramupfukamira.

¹⁰ Maze Yesu arababwira ati “Mwitinya, nimugende mubwire bene Data bajye i Galilaya, ni ho bazambonera.”

¹¹ Bakigenda, bamwe muri ba barinzi bajya mu murwa babwira abatambyi bakuru ibyabaye byose.

¹² Bateranira hamwe n'abakuru bajya inama, bagurira abasirikare ifeza nyinshi

¹³ bati “Mujye muvuga muti ‘Abigishwa be baje nijoro dusinziriye, baramwiba.’

¹⁴ Umutegeka naramuka abyumvise tuzamwemeza, namwe tuzabakiza amakuba.”

¹⁵ Nuko baherako bijyanira ifeza, babigenza uko bohejwe. Iryo jambo ryamamara mu Bayuda na bugingo n'ubu.

Yesu atuma abigishwa be mu mahanga yose

¹⁶ Nuko abigishwa cumi n'umwe bajya i Galilaya ku musozi Yesu yabategetse.

¹⁷ Bamubonye baramupfukamira, ariko bamwe barashidikanya.

¹⁸ Nuko Yesu arabegera avugana na bo ati “Nahawe ubutware bwose mu ijuru no mu isi.

¹⁹ Nuko mugende muhindure abantu bo mu mahanga yose abigishwa, mubabatiza mu izina rya Data wa twese n'Umwana n'Umwuka Wera,

²⁰ mubigisha kwitondera ibyo nababwiye byose. Kandi dore ndi kumwe namwe iminsi yose kugeza ku mperuka y'isi.”