Matayo 26 - Bibiliya Yera

Bajya inama yo kwica Yesu

¹ Nuko Yesu arangije ayo magambo yose abwira abigishwa be ati

² “Muzi yuko iminsi ibiri nishira hazabaho Pasika, Umwana w'umuntu azagambanirwa abambwe.”

³ Maze abatambyi bakuru n'abakuru b'ubwo bwoko, bateranira mu rugo rw'Umutambyi mukuru witwaga Kayafa,

⁴ bagira inama hamwe yo koshyoshya Yesu ngo babone uko bamufata, bamwice.

⁵ Ariko baravuga bati “Twe kumufata mu minsi mikuru, kugira ngo bidatera abantu imidugararo.”

Yesu asīgirwa amavuta mu nzu ya Simoni umubembe

⁶ Yesu ari i Betaniya mu nzu ya Simoni umubembe,

⁷ umugore aza aho ari afite umukondo w'amavuta meza, ameze nk'amadahano y'igiciro cyinshi cyane, ayamusuka ku mutwe yicaye arya.

⁸ Abigishwa babibonye bararakara bati “Aya mavuta apfiriye iki ubusa,

⁹ ko yajyaga kugurwa impiya nyinshi zigafasha abakene?”

¹⁰ Ariko Yesu abimenye arababaza ati “Uyu mugore muramuterera iki agahinda, ko ankoreye umurimo mwiza?

¹¹ Abakene muri kumwe na bo iteka, ariko jyeweho ntituri kumwe iteka.

¹² Igitumye uyu mugore ansukaho ayo mavuta ku mubiri, ni ukuwutunganiriza guhambwa.

¹³ Ndababwira ukuri yuko aho ubutumwa bwiza buzigishirizwa hose mu isi yose, icyo uyu mugore ankoreye kizavugirwa kugira ngo bamwibuke.”

Yuda agurisha Yesu

¹⁴ Hanyuma umwe muri abo cumi na babiri witwaga Yuda Isikariyota, asanga abatambyi bakuru

¹⁵ arababaza ati “Mwampa iki nkamubagenzereza?” Bamugerera ibice by'ifeza mirongo itatu,

¹⁶ aherako ashaka uburyo yamubagenzereza.

Yesu n'abigishwa be basangira ibya Pasika

¹⁷ Ku munsi wa mbere wo kurya imitsima idasembuwe, abigishwa begera Yesu baramubaza bati “Urashaka ko dutunganiriza he aho uri burīre ibya Pasika?”

¹⁸ Arabasubiza ati “Mujye mu murwa kwa ntuza, mumubwire muti ‘Umwigisha aravuze ngo igihe cye kirenda kugera, ngo iwawe ni ho ari busangirire ibya Pasika n'abigishwa be.’ ”

¹⁹ Abigishwa bagenza uko Yesu yababwiye, baringaniza ibya Pasika.

²⁰ Bugorobye yicarana n'abigishwa cumi na babiri ngo basangire.

²¹ Bakirya arababwira ati “Ndababwira ukuri, yuko umwe muri mwe ari bungambanire.”

²² Barababara cyane, baherako bamubaza umwe umwe bati “Mwami, ni jye?”

²³ Na we arabasubiza ati “Uwo duhuriza amaboko ku mbehe, ni we uri bungambanire.

²⁴ Umwana w'umuntu aragenda nk'uko byanditswe kuri we, ariko uwo muntu ugambanira Umwana w'umuntu azabona ishyano, ibyajyaga kumubera byiza ni uko aba ataravutse.”

²⁵ Yuda uwo wari ugiye kumugambanira aramubaza ati “Mwigisha, ni jye?” Aramusubiza ati “Wakabimenye.”

Yesu atanga ifunguro ryera

²⁶ Bakirya Yesu yenda umutsima arawushimira, arawumanyagura, awuha abigishwa be arababwira ati “Nimwende murye, uyu ni umubiri wanjye.”

²⁷ Yenda igikombe aragishimira, arakibaha, arababwira ati “Munywere kuri iki mwese,

²⁸ kuko aya ari amaraso yanjye y'isezerano rishya, ava ku bwa benshi ngo bababarirwe ibyaha.

²⁹ Ariko ndababwira rwose yuko ntazanywa ku mbuto z'imizabibu, mpereye none nkageza umunsi nzasangirira namwe vino nshya mu bwami bwa Data.”

³⁰ Bamaze kuririmba barasohoka, bajya ku musozi wa Elayono.

Yesu ahanura ko Petero ari bumwihakane gatatu

³¹ Maze Yesu arababwira ati “Mwebwe mwese iri joro ibyanjye birabahemuza, kuko byanditswe ngo ‘Nzakubita umwungeri, umukumbi w'intama usandare.’

³² Ariko nimara kuzūrwa, nzababanziriza kujya i Galilaya.”

³³ Maze Petero aramusubiza ati “Nubwo bose ibyawe biri bubagushe, jyeweho ntabwo bizangusha.”

³⁴ Yesu aramubwira ati “Ndakubwira ukuri yuko muri iri joro, inkoko itarabika uri bunyihakane gatatu.”

³⁵ Petero aramubwira ati “Naho byatuma mpfana nawe, na bwo sindi bukwihakane na hato.” N'abandi bigishwa bose bavuga batyo.

Yesu asengana umubabaro ari i Getsemani

³⁶ Maze Yesu agerana na bo ahitwa i Getsemani, abwira abigishwa be ati “Nimube mwicaye aha nigire hariya nsenge.”

³⁷ Ajyana Petero na bene Zebedayo bombi, atangira kubabara no guhagarika umutima cyane.

³⁸ Maze arababwira ati “Umutima wanjye ufite agahinda kenshi kenda kunyica. Mugume hano, mubane maso nanjye.”

³⁹ Yigira imbere ho hato arunama, arasenga ati “Data, niba bishoboka iki gikombe kindenge, ariko bye kuba uko jyewe nshaka, ahubwo bibe uko wowe ushaka.”

⁴⁰ Agaruka aho abigishwa bari asanga basinziriye, abaza Petero ati “Harya ntimubashije kubana maso nanjye isaha imwe?

⁴¹ Mube maso, musenge mutajya mu moshya. Umutima ni wo ukunze, ariko umubiri ufite intege nke.”

⁴² Yongera kugenda ubwa kabiri arasenga ati “Data, niba bidashoboka ko iki kindenga, ngo kereka nkinywereyeho, ibyo ushaka abe ari byo biba.”

⁴³ Yongeye kugaruka asanga basinziriye, kuko amaso yabo aremereye.

⁴⁴ Arongera abasiga aho aragenda, asenga ubwa gatatu avuga amagambo amwe n'aya mbere.

⁴⁵ Maze agaruka aho abigishwa bari arababwira ati “Musinzire noneho, muruhuke. Dore igihe kirenda gusohora, Umwana w'umuntu agambaniwe mu maboko y'abanyabyaha.

⁴⁶ Nimubyuke tugende, dore ungenza ari hafi.”

Bafata Yesu

⁴⁷ Akibivuga, Yuda umwe muri abo cumi na babiri azana n'igitero kinini gifite inkota n'inshyimbo, giturutse ku batambyi bakuru n'abakuru b'ubwo bwoko.

⁴⁸ Ariko umugambanira yari yabahaye ikimenyetso ati “Uwo ndi busome, ni we uwo mumufate.”

⁴⁹ Uwo mwanya yegera Yesu aramubwira ati “Ni amahoro Mwigisha”, aramusomagura.

⁵⁰ Yesu aramubwira ati “Mugenzi wanjye, kora ikikuzanye.” Maze baraza basumira Yesu, baramufata.

⁵¹ Umwe muri abo bari kumwe na Yesu arambura ukuboko, akura inkota ye, ayikubita umugaragu w'Umutambyi mukuru, amuca ugutwi.

⁵² Maze Yesu aramubwira ati “Subiza inkota yawe mu rwubati rwayo, kuko abatwara inkota bose bazicwa n'inkota.

⁵³ Mbese wibwira yuko ntabasha gusaba Data, akanyoherereza abamarayika nonaha basāga legiyoni cumi n'ebyiri?

⁵⁴ Ariko rero bibaye bityo, ibyanditswe byasohora bite kandi ari ko bikwiriye kuba?”

⁵⁵ Uwo mwanya Yesu abaza igitero ati “Harya muhurujwe no kumfata nk'uko muzira umwambuzi, mufite inkota n'inshyimbo? Nicaraga mu rusengero iminsi yose nigisha, kuki mutamfashe?

⁵⁶ Ariko ibi byose bibereyeho kugira ngo ibyanditswe n'abahanuzi bisohore.” Nuko abigishwa bose baramuhāna, barahunga.

Abatambyi bacira Yesu urubanza rwo gupfa

⁵⁷ Abafashe Yesu bamujyana kwa Kayafa Umutambyi mukuru, ari ho abanditsi n'abakuru bari bateraniye.

⁵⁸ Petero amukurikira arenga ahinguka agera ku rugo rw'Umutambyi mukuru, arujyamo yicarana n'abagaragu ngo arebe amaherezo.

⁵⁹ Maze abatambyi bakuru n'abanyarukiko bose bashaka Yesu ho ibirego by'ibinyoma ngo babone uko bamwica,

⁶⁰ barabibura nubwo haje abagabo b'ibinyoma benshi. Hanyuma haza babiri

⁶¹ baravuga bati “Uyu yagize ngo yabasha gusenya urusengero rw'Imana, akarwubaka mu minsi itatu.”

⁶² Umutambyi mukuru arahaguruka aramubaza ati “Ntiwiregura na hato? Ntiwumvise ibyo aba bakureze?”

⁶³ Yesu aricecekera. Umutambyi mukuru aramubwira ati “Nkurahirije Imana ihoraho, tubwire niba ari wowe Kristo, Umwana w'Imana.”

⁶⁴ Yesu aramusubiza ati “Wakabimenye, kandi ndababwira yuko hanyuma muzabona Umwana w'umuntu yicaye iburyo bw'ubushobozi bw'Imana, aje ku bicu byo mu ijuru.”

⁶⁵ Umutambyi mukuru abyumvise atyo ashishimura imyenda ye ati “Arigereranije. Turacyashakira iki abagabo? Dore noneho mwiyumviye kwigereranya kwe.

⁶⁶ Muratekereza iki?” Baramusubiza bati “Akwiriye kwicwa.”

⁶⁷ Nuko bamucira amacandwe mu maso, bamukubita ibipfunsi, abandi bamukubita inshyi bati

⁶⁸ “Duhanure Kristo, ni nde ugukubise?”

Petero yihakana Yesu

⁶⁹ Ubwo Petero yari yicaye hanze mu rugo, umuja aramwegera aramubwira ati “Nawe wari kumwe na Yesu w'Umunyagalilaya.”

⁷⁰ Maze abihakanira imbere ya bose ati “Ibyo uvuze sinzi ibyo ari byo.”

⁷¹ Arasohoka ageze mu bikingi by'amarembo undi muja aramubona, abwira abahari ati “N'uyu yari kumwe na Yesu w'i Nazareti.”

⁷² Yongera kubihakana arahira ati “Uwo muntu simuzi.”

⁷³ Hashize umwanya muto, abari bahagaze aho baraza babwira Petero bati “Ni ukuri nawe uri umwe muri bo, ndetse ni imvugo yawe irakumenyekanishije.”

⁷⁴ Maze atangira kwivuma no kurahira ati “Uwo muntu simuzi.” Muri ako kanya inkoko irabika.

⁷⁵ Petero yibuka ijambo Yesu yari yavuze ati “Inkoko itarabika uri bunyihakane gatatu.” Arasohoka ararira cyane.