Matayo 24 - Bibiliya Yera

Ibyerekeye kurimbuka kwa Yerusalemu, no kugaruka kwa Yesu

¹ Yesu asohoka mu rusengero. Akigenda, abigishwa be baramusanga bashaka kumwereka imyubakire y'urusengero.

² Arababwira ati “Ntimureba ibi byose? Ndababwira ukuri yuko aha hatazasigara ibuye rigeretse ku rindi ritajugunywe hasi.”

³ Yicaye ku musozi wa Elayono, abigishwa baza aho ari biherereye baramubaza bati “Tubwire, ibyo bizaba ryari, n'ikimenyetso cyo kuza kwawe n'icy'imperuka y'isi ni ikihe?”

⁴ Yesu arabasubiza ati “Mwirinde hatagira umuntu ubayobya,

⁵ kuko benshi bazaza biyita izina ryanjye bati ‘Ni jye Kristo’, bazayobya benshi.

⁶ Muzumva iby'intambara n'impuha z'intambara, mwirinde mudahagarika imitima kuko bitazabura kubaho, ariko imperuka izaba itaraza.

⁷ Ishyanga rizatera irindi shyanga, n'ubwami buzatera ubundi bwami, hazabaho inzara n'ibishyitsi hamwe na hamwe.

⁸ Ariko ibyo byose bizaba ari itangiriro ryo kuramukwa.

⁹ “Ubwo ni bwo bazabagambanira ngo mubabazwe, ndetse bazabica, muzangwa n'amahanga yose abahora izina ryanjye.

¹⁰ Ni bwo benshi bazasubira inyuma, bazagambanirana bangane.

¹¹ N'abahanuzi benshi b'ibinyoma bazaduka bayobye benshi.

¹² Maze kuko ubugome buzagwira, urukundo rwa benshi ruzakonja.

¹³ Ariko uwihangana akageza imperuka ni we uzakizwa.

¹⁴ Kandi ubu butumwa bwiza bw'ubwami buzigishwa mu isi yose, ngo bube ubuhamya bwo guhamiriza amahanga yose, ni bwo imperuka izaherako ize.

¹⁵ “Ariko ubwo muzabona ikizira kirimbura cyahanuwe n'umuhanuzi Daniyeli gihagaze Ahera, (ubisoma abyitondere),

¹⁶ icyo gihe abazaba bari i Yudaya bazahungire ku misozi,

¹⁷ n'uzaba ari hejuru y'inzu ye ntazamanuka ngo atware ku bintu byo mu nzu ye,

¹⁸ n'uzaba ari mu mirima ye ntazasubira imuhira ngo azane umwenda we.

¹⁹ Abazaba batwite n'abonsa muri iyo minsi bazabona ishyano.

²⁰ Namwe musengere kugira ngo guhunga kwanyu kutazabaho mu mezi y'imbeho cyangwa ku isabato,

²¹ kuko muri iyo minsi hazabaho umubabaro mwinshi, utigeze kubaho uhereye ku kuremwa ku isi ukageza none, kandi ntuzongera kubaho.

²² Iyo minsi iyaba itagabanijweho ntihajyaga kuzarokoka n'umwe, ariko ku bw'intore iyo minsi izagabanywaho.

²³ “Icyo gihe umuntu nababwira ati ‘Dore Kristo ari hano’, n'undi ati ‘Ari hano’, ntimuzabyemere.

²⁴ Kuko abiyita Kristo n'abahanuzi b'ibinyoma bazaduka bakora ibimenyetso bikomeye n'ibitangaza, kugira ngo babone uko bayobya n'intore niba bishoboka.

²⁵ Dore mbibabwiye bitaraba.

²⁶ “Nuko nibababwira bati ‘Dore ari mu butayu’, ntimuzajyeyo, cyangwa bati ‘Dore ari mu kirambi’, ntimuzabyemere.

²⁷ Kuko nk'uko umurabyo urabiriza iburasirazuba ukabonekera aho rirengera, ni ko no kuza k'Umwana w'umuntu kuzaba.

²⁸ “Aho intumbi iri hose, ni ho inkongoro ziteranira.

²⁹ “Ariko hanyuma y'umubabaro wo muri iyo minsi, uwo mwanya ‘Izuba rizijima, n'ukwezi ntikuzava umwezi wako, n'inyenyeri zizagwa ziva mu ijuru, n'imbaraga zo mu ijuru zizanyeganyega.’

³⁰ Ubwo ni bwo ikimenyetso cy'Umwana w'umuntu kizabonekera mu ijuru, n'amoko yose yo mu isi ni bwo azaboroga abonye Umwana w'umuntu aje ku bicu byo mu ijuru, afite ubushobozi n'ubwiza bwinshi.

³¹ Azatumisha abamarayika be ijwi rirenga ry'impanda, bateranye intore ze mu birere bine, uhereye impera y'ijuru ukageza iyindi mpera yaryo.

Uko bizamera ubwo Yesu azagaruka

³² “Murebere ku mutini ni wo cyitegererezo: ishami ryawo, iyo ritoshye ibibabi bikamera, mumenya yuko igihe cy'impeshyi kiri bugufi.

³³ Nuko namwe nimubona ibyo byose, muzamenye yuko ari hafi, ndetse ageze ku rugi.

³⁴ Ndababwira ukuri yuko ab'ubu bwoko batazashiraho kugeza aho ibyo byose bizasohorera.

³⁵ Ijuru n'isi bizashira, ariko amagambo yanjye ntazashira na hato.

³⁶ “Ariko uwo munsi n'icyo gihe nta wubizi, naho baba abamarayika bo mu ijuru cyangwa Umwana, keretse Data wenyine.

³⁷ Uko iminsi ya Nowa yari iri, no kuza k'Umwana w'umuntu ni ko kuzaba,

³⁸ kuko nk'uko bari bameze muri iyo minsi yabanjirije umwuzure, bararyaga, baranywaga, bararongoraga, barashyingiraga, bageza umunsi Nowa yinjiriye mu nkuge,

³⁹ ntibabimenya kugeza aho umwuzure waziye ukabatwara bose. Ni ko no kuza k'Umwana w'umuntu kuzaba.

⁴⁰ Icyo gihe abagabo babiri bazaba bari mu murima, umwe azajyanwa undi asigare,

⁴¹ abagore babiri bazaba basya ku rusyo, umwe azajyanwa undi asigare.

⁴² “Nuko mube maso kuko mutazi umunsi Umwami wanyu azazaho.

⁴³ Ariko ibi mubimenye, iyaba nyir'urugo yari amenye igicuku umujura azaziramo yabaye maso, ntiyamukundiye gucukura inzu ye.

⁴⁴ Nuko namwe mwitegure, kuko igihe mudatekereza ari cyo Umwana w'umuntu azaziramo.

Umugani w'abagaragu babiri

⁴⁵ “Mbese ni nde mugaragu ukiranuka w'ubwenge, shebuja yasigiye abo mu rugo rwe kubagerera igerero igihe cyaryo?

⁴⁶ Uwo mugaragu arahirwa, shebuja naza agasanga abikora.

⁴⁷ Ndababwira ukuri yuko azamwegurira ibintu bye byose.

⁴⁸ Ariko umugaragu mubi niyibwira mu mutima we ati ‘Databuja aratinze’,

⁴⁹ maze agatangira gukubita abagaragu bagenzi be no gusangira n'abasinzi,

⁵⁰ shebuja w'uwo mugaragu azaza umunsi atamutegereje n'igihe atazi,

⁵¹ amucemo kabiri amuhanane n'indyarya. Ni ho bazaririra bakahahekenyera amenyo.