Matayo 22 - Bibiliya Yera

Umugani w'ubukwe bw'umwana w'umwami

¹ Yesu yongera kuvugana na bo abacira imigani ati

² “Ubwami bwo mu ijuru bugereranywa n'umwami wacyujije ubukwe bw'umwana we arongora,

³ atuma abagaragu be guhamagara abatorewe gutaha ubukwe, banga kuza.

⁴ Arongera atuma abandi bagaragu ati ‘Mubwire abatowe muti: Dore niteguye amazimano, amapfizi yanjye n'inka zibyibushye babibāze, byose byiteguwe, muze mu bukwe.’

⁵ “Maze abo ntibabyitaho barigendera, umwe ajya mu gikingi cye, undi ajya mu rutundo rwe,

⁶ abasigaye bafata abagaragu be barabashinyagurira, barabica.

⁷ Maze umwami ararakara agaba ingabo ze, arimbura abo bicanyi atwika umudugudu wabo.

⁸ Maze abwira abagaragu be ati ‘Ubukwe bwiteguwe, ariko abari babutorewe ntibari babukwiriye.

⁹ Nuko mujye mu nzira nyabagendwa, abo muri buboneyo bose mubahamagare baze batahe ubukwe.’

¹⁰ Abo bagaragu barasohoka bajya mu nzira, bateranya abo babonye bose, ababi n'abeza, inzu yo gucyurizamo ubukwe yuzura abasangwa.

¹¹ “Umwami yinjiye kureba abasangwa, abonamo umuntu utambaye umwenda w'ubukwe.

¹² Aramubaza ati ‘Mugenzi wanjye, ni iki gitumye winjira hano utambaye umwenda w'ubukwe?’ Na we arahora rwose.

¹³ Maze umwami abwira abagaragu be ati ‘Nimumubohe amaboko n'amaguru, mumujugunye mu mwijima hanze, ni ho bazaririra bakahahekenyera amenyo’,

¹⁴ kuko abatowe ari benshi, ariko abatoranyijwe bakaba bake.”

Abafarisayo bamugerageresha iby'umusoro

¹⁵ Maze Abafarisayo baragenda bajya inama y'uko bari bumutegeshe amagambo.

¹⁶ Bamutumaho abigishwa babo hamwe n'Abaherode bati “Mwigisha, tuzi yuko uri inyangamugayo kandi ko wigisha inzira y'Imana by'ukuri, nturobanura abantu ku butoni, kuko utita ku cyubahiro cy'umuntu wese.

¹⁷ Nuko tubwire, utekereza ute? Amategeko yemera ko duha Kayisari umusoro, cyangwa ntiyemera?”

¹⁸ Ariko Yesu amenya uburiganya bwabo, arababaza ati “Mungeragereje iki, mwa ndyarya mwe?

¹⁹ Nimunyereke ifeza y'umusoro.” Bamuzanira idenariyo.

²⁰ Arababaza ati “Iyi shusho n'iri zina ni ibya nde?”

²¹ Baramusubiza bati “Ni ibya Kayisari.” Maze arababwira ati “Nuko rero ibya Kayisari mubihe Kayisari, iby'Imana mubihe Imana.”

²² Babyumvise barumirwa, bamusiga aho baragenda.

Yesu asubiza Abasadukayo ibyo kuzuka

²³ Uwo munsi Abasadukayo bahakanaga yuko ari nta wuzuka, baza aho ari baramubaza bati

²⁴ “Mwigisha, Mose yaravuze ngo umuntu napfa batarabyarana, mwene se nahungure umugore we acikure mwene se.

²⁵ Nuko iwacu habayeho abavandimwe barindwi, uwa mbere yararongoye arapfa, maze kuko batabyaranye araga mwene se umugore we.

²⁶ Nuko n'uwa kabiri n'uwa gatatu kugeza kuri bose uko ari barindwi bamera batyo.

²⁷ Hanyuma wa mugore na we arapfa.

²⁸ Mbese mu izuka, azaba ari muka nde muri bose uko ari barindwi, ko bose bari bamufite?”

²⁹ Yesu arabasubiza ati “Mwarahabye kuko mutamenye ibyanditswe cyangwa imbaraga z'Imana.

³⁰ Mu izuka ntibarongora kandi ntibashyingirwa, ahubwo bamera nk'abamarayika bo mu ijuru.

³¹ Ariko se ibyerekeye ku kuzuka kw'abapfuye, ntimwari mwasoma icyo Imana yababwiye ngo

³² ‘Ni jye Mana ya Aburahamu n'Imana ya Isaka n'Imana ya Yakobo?’ Imana si Imana y'abapfuye, ahubwo ni iy'abazima.”

³³ Abantu babyumvise batangazwa no kwigisha kwe.

Itegeko rirusha ayandi gukomera

³⁴ Ariko Abafarisayo bumvise yuko yatsinze Abasadukayo, bakananirwa kumusubiza, bateranira hamwe,

³⁵ umwe muri bo w'umwigishamategeko amubaza amugerageza ati

³⁶ “Mwigisha, itegeko rikomeye mu mategeko ni irihe?”

³⁷ Na we aramusubiza ati “ ‘Ukundishe Uwiteka, Imana yawe umutima wawe wose n'ubugingo bwawe bwose n'ubwenge bwawe bwose.’

³⁸ Iryo ni ryo tegeko rikomeye ry'imbere.

³⁹ N'irya kabiri rihwanye na ryo ngiri ‘Ukunde mugenzi wawe nk'uko wikunda.’

⁴⁰ Muri ayo mategeko yombi, amategeko yose n'ibyahanuwe ni yo yuririraho.”

Yesu ni Umwana wa Dawidi

⁴¹ Abafarisayo bagiteranye, Yesu arababaza ati

⁴² “Ibya Kristo murabitekereza mute? Ni mwene nde?” Baramusubiza bati “Ni mwene Dawidi.”

⁴³ Arababaza ati “Nuko rero ni iki cyatumye Dawidi yabwirijwe n'Umwuka amwita umwami we ati

⁴⁴ ‘Uwiteka yabwiye Umwami wanjye ati: Icara iburyo bwanjye, Ugeze aho nzashyirira abanzi bawe munsi y'ibirenge byawe.’

⁴⁵ Nuko ubwo Dawidi amwita umwami we, none abasha ate no kuba umwana we?”

⁴⁶ Ntihagira umuntu wabasha kumusubiza ijambo, ndetse uhereye uwo munsi nta muntu watinyutse kongera kugira icyo amubaza.