Matayo 20 - Bibiliya Yera

Umugani w'abahinzi bo mu ruzabibu

¹ “Ubwami bwo mu ijuru bwagereranywa n'umuntu ufite urugo, yazindutse kare gushaka abahinzi ngo bahingire uruzabibu rwe.

² Asezerana n'abahinzi idenariyo ku munsi umwe, abohereza mu ruzabibu rwe.

³ Isaha eshatu arasohoka, asanga abandi bahagaze mu iguriro nta cyo bakora,

⁴ na bo arababwira ati ‘Namwe mujye mu ruzabibu rwanjye ndi bubahe ibikwiriye.’

⁵ Baragenda. Yongera gusohoka mu isaha esheshatu n'isaha cyenda, abigenza atyo.

⁶ Isaha zibaye cumi n'imwe arasohoka, asanga abandi bahagaze arababaza ati ‘Ni iki kibahagaritse hano umunsi wose nta cyo mukora?’

⁷ Baramusubiza bati ‘Kuko ari nta waduhaye umurimo.’ Arababwira ati ‘Namwe mujye mu ruzabibu rwanjye.’

⁸ “Bugorobye nyir'uruzabibu abwira igisonga cye ati ‘Hamagara abahinzi ubahe ibihembo byabo, utangirire ku ba nyuma ugeze ku ba mbere.’

⁹ Abatangiye mu isaha cumi n'imwe baje, umuntu wese ahabwa idenariyo imwe.

¹⁰ Ababanje baje bibwira ko bahembwa ibirutaho, ariko umuntu wese ahembwa idenariyo imwe.

¹¹ Bazihawe bitotombera nyir'uruzabibu bati

¹² ‘Aba ba nyuma bakoze isaha imwe, ubanganyije natwe abahingitse umunsi wose tuvunika, twicwa n'izuba!’

¹³ “Na we asubiza umwe muri bo ati ‘Mugenzi wanjye, sinkugiriye nabi. Ntuzi ko twasezeranye idenariyo imwe?

¹⁴ Ngiyo yijyane ugende. Ko nshatse guhemba uwa nyuma nkawe,

¹⁵ mbese hari icyambuza kugenza ibyanjye uko nshaka, ko undeba igitsure, kuko ngize ubuntu!’

¹⁶ “Uko ni ko ab'inyuma bazaba ab'imbere, kandi ab'imbere bazaba ab'inyuma.”

Yesu avuga iby'urupfu rwe

¹⁷ Yesu yenda kuzamuka ngo ajye i Yerusalemu, yihererana n'abo cumi na babiri, ababwirira mu nzira ati

¹⁸ “Dore turazamuka tujya i Yerusalemu, Umwana w'umuntu azagambanirwa mu batambyi bakuru n'abanditsi, bamucire urubanza rwo kumwica.

¹⁹ Bazamugambanira mu bapagani bamushinyagurire, bamukubite imikoba bamubambe, ku munsi wa gatatu azazurwa.”

Ubukuru bwo mu bwami bw'Imana

²⁰ Maze nyina wa bene Zebedayo azana n'abana be aho ari, aramupfukamira ngo agire icyo amusaba.

²¹ Na we aramubaza ati “Urashaka iki?” Aramusubiza ati “Tegeka ko aba bana banjye bombi bazicara mu bwami bwawe, umwe iburyo bwawe undi ibumoso.”

²² Yesu aramusubiza ati “Ntimuzi icyo musaba. Mwabasha kunywera ku gikombe nzanyweraho?” Bati “Turabibasha.”

²³ Arababwira ati “Ni ukuri igikombe cyanjye muzakinyweraho, ariko kwicara iburyo bwanjye n'ibumoso si jye ubigaba, keretse abo Data yabitunganyirije.”

²⁴ Ba bandi cumi babyumvise barakarira abo bavandimwe bombi.

²⁵ Yesu arabahamagara arababwira ati “Muzi yuko abami b'abanyamahanga babatwaza igitugu, n'abakomeye babo bahawe kubategeka.

²⁶ Ariko muri mwe si ko biri, ahubwo ushaka kuba mukuru muri mwe ajye aba umugaragu wanyu,

²⁷ kandi ushaka kuba uw'imbere muri mwe, ajye aba imbata yanyu,

²⁸ nk'uko Umwana w'umuntu ataje gukorerwa, ahubwo yaje gukorera abandi no gutangira ubugingo bwe kuba incungu ya benshi.”

Yesu ahumūra impumyi ebyiri

²⁹ Bakiva i Yeriko, abantu benshi baramukurikira.

³⁰ Impumyi ebyiri zari zicaye iruhande rw'inzira, zumvise yuko Yesu ahanyura, zirataka cyane ziti “Mwami mwene Dawidi, tubabarire.”

³¹ Abantu barazicyaha ngo zihore, ariko zirushaho gutaka ziti “Mwami mwene Dawidi, tubabarire.”

³² Yesu arahagarara arazihamagara, arazibaza ati “Murashaka ko mbagirira nte?”

³³ Ziramusubiza ziti “Mwami, amaso yacu ahumuke.”

³⁴ Yesu azigirira imbabazi akora ku maso yazo, uwo mwanya zirahumuka, baramukurikira.